एजेन्सी । बलिउड अभिनेता अजय देवगनले मुम्बईको अंधेरी वेस्ट क्षेत्रमा नयाँ अफिस किनेका छन् । ५ युनिट अफिस भएको यस सम्पत्तिको मूल्य ४५ करोड रुपैयाँ रहेको बताइएको छ ।
मनी कन्ट्रोलको रिपोर्ट अनुसार ओशिवारास्थित सिग्नेचर बिल्डिङको १६ औं र १७ औं तल्लामा खरिद गरिएको यस कार्यालयको कुल स्थान १३ हजार २९३ वर्ग फुट छ । यद्यपी अजयले अहिलेसम्म यी रिपोर्टमा कुनै प्रतिक्रिया दिएका छैनन् ।
अजयले यो सम्पत्ति आफ्नो मूल नाम विशाल वीरेन्द्र देवगनको नाममा दर्ता गराएका छन् । अभिनेताले यो अफिस युनिट किन्नुभन्दा पाँच दिनअघि उनकी श्रीमती तथा अभिनेत्री काजोलले १६.५ करोडको अपार्टमेन्ट किनेकी थिइन् । २,४९३ वर्ग फुटको कार्पेट क्षेत्र भएको यस अपार्टमेन्टमा ४ वटा कार पार्किङ स्थलहरू छन् ।
कामको कुरा गर्दा हालै अजयको फिल्म ‘भोला’ रिलिज भएको थियो । उनले हालै अभिषेक कपुरको अर्को फिल्मको सुटिङ सुरु गरेका छन् । जसमा उनका साथमा भतिजा अमन देवगन र रविना टण्डनकी छोरी राशि थडानी देखिनेछन् । यसबाहेक अजय फिल्म ‘मैदान’ को लागि सही रिलिज मिति खोजिरहेका छन् ।
