काठमाडौँ । ललितपुर जिल्ला अदालतका न्यायाधीश कर्मचारीहरु सर्वोच्च अदालत पुगेका छन् । कानून व्यवसायीहरुबाट आफूहरूलाई खतरा भएको भन्दै कार्यालय छाडेर उनीहरु सर्वोच्च अदालत पुगेका हुन् ।
कानून व्यवसायीबाट आफूहरूलाई धम्की आएको र कार्यस्थलमा बसेर कामकाज गर्न सक्ने अवस्था नरहेको उनीहरुले बताएका छन् ।
हिजो सोमबार बार एसोसिएसनको केन्द्रीय कार्यसमितिकै आयोजनामा ललितपुर जिल्ला अदालत बाहिर आमसभा गरी कर्मचारीको मानमर्दन हुने गरी अभिव्यक्ति दिइएको र बारले आफ्नो क्षेत्राधिकार र सीमा मिचेर कुनै अमुक कर्मचारीलाई यहाँ सरुवा गर भन्नु कानून विपरीतको कार्य भएको भन्दै न्यायाधीश तथा कर्मचारीहरुले आपत्ति जनाएका छन् ।
ललितपुर जिल्ला अदालतका न्यायाधीश, स्रेस्तेदार विष्णुप्रसाद पाण्डे लगायतको समूह यति बेला सर्वोच्च अदालतमा पुगेको नेपाल राष्ट्रिय कर्मचारी संगठन निजामती विभागीय समिति सर्वोच्च अदालतका अध्यक्ष हरि भट्टराईले न्युजपोलारलाई जानकारी दिनुभयो । ।
न्यायाधीश र कर्मचारीहरु नै कामकाज छाडेर सर्वोच्च अदालत पुगेपछि सर्वोच्च अदालत प्रशासनले उहाँहरुसँग छलफल गरी काममा फर्किन आग्रह गरेको छ ।
तर कर्मचारीहरूले भने आफूहरूको जिउधनको सुरक्षाको ग्यारेन्टी नभएसम्म काममा नफर्कने बताएका छन् ।
कर्मचारीहरुले यथाअवस्थामा कार्यकक्षमा बसेर कामकाज गर्न नसक्ने अवस्थामा पुगेको बताएका छन् । उनीहरुले विवादलाई बढाउने भन्दा पनि समाधान गर्नुपर्छ नै भनेर लागेको तर बार एसोसिएसन भने यसलाई अतिरञ्जित बनाउन लागिपरेको आरोप लगाएका छन् ।
आफूहरु जसको गल्ती हो, उसलाई कारबाही गर्नुपर्छ भन्ने पक्षमा भए पनि बार भने कर्मचारीको मनोबल गिराउने र क्षेत्राधिकार मिचेर सरुवाको माग गर्नतिर अग्रसर रहेको कर्मचारीहरुको भनाइ छ ।
कर्मचारीहरू कार्यालयमा उपस्थित नभएपछि ललितपुर जिल्ला अदालतमा पेसी व्यवस्थापन लगायतको काम हुन सकेको छैन ।
https://www.facebook.com/newspolar/videos/658101252464733
