काठमाडौँ । संस्कृति, पर्यटन तथा नागरिक उड्डयनमन्त्री सुदन किराँतीले सोध्नु भएको स्पष्टीकरणको जवाफ नेपाल नागरिक उड्डयन प्राधिकरण (क्यान) का महानिर्देशक ई प्रदीप अधिकारीले दिन अस्वीकार गर्नु भएको छ ।
तालुकदार मन्त्रालयकोतर्फबाट मन्त्री किराँतीले एक हप्ताकाको समय सिमा दिँदै यही असार ११ गते नौँ बुँदे स्पष्टीकरण सोध्नु भएको थियो । उता महानिर्देशक ई अधिकारीले सामाजिक संञ्जालमा लेख्नु भएको छ, ‘प्राधिकरण स्वयत्व संस्था हो, म मन्त्री परिषद्बाट नियुक्त भएको महानिर्देशक हुँ, मलाई मन्त्रीपरिषद्बाट नियुक्त गरेकोले मलाई स्पष्टिकरण सोध्ने अधिकार मन्त्री परिषद्लाई मात्रै रहेको छ ।’
यसैगरी उहाँले आफू प्राधिकरणको कर्मचारी भएकाले हवाई क्षेत्रको सुधार एवम् सुरक्षामा प्रतिबद्ध रहेको जनाउँदै आफूमाथि कारबाही भए भोग्न तयार रहेको बताउनु भएको छ ।
महानिर्देशक ई अधिकारीले सरकारको नीति विपरीत अभिव्यक्ति दिँदै हिँडेको, हवाई सुरक्षा तथा नियमनमा ख्याल नगरेको, नेपाली हवाई उड्डयन क्षेत्रलाई आईकाओको कालोसूचीबाटहटाउन भूमिका नखेलेको, हालै सञ्चालनमा आएका दुई अन्तर्राष्ट्रिय विमानस्थल पोखरा र भैरहवाबाट समेत नियमित उडान गराउन नसकेको भन्दै मन्त्री किरातीले स्पष्टीकरण सोध्नु भएको थियो ।
