काठमाडौँ । काठमाडौं महानगरपालिकाले आफ्नो मातहतका निजी विद्यालयहरुको ‘प्लस टु’ को शुल्क विवरण बुझाउन निर्देशन दिएको छ ।
महानगर भित्र पर्ने ५२० निजी विद्यालयहरुलाई पत्राचार गर्दै महानगरले कक्षा ११ र १२ (प्लस टु) मा नयाँ शैक्षिक सत्र २०८०/८१ का लागि लिइने शुल्क विवरण बुझाउन निर्देशन दिएको हो ।
महानगरले यही असार ५ गते सबै विद्यालयलाई पत्राचार गर्दै असार मसान्तभित्र सो विवरण पठाउन निर्देशन दिएको छ । “विद्यालयहरुले के–के शीर्षकमा के कति शुल्क लिने हो रु महानगरको शिक्षा ऐन २०७५ को दफा २७ (९) बमोजिम पेश गर्नुहोला”, पत्रमा उल्लेख छ ।
साथै परिपत्रमा शुल्क विवरण पेश गर्दा विद्यालय व्यवस्थापन समितिको निर्णयसहित पेश गर्नुपर्ने उल्लेख छ । संस्थागत विद्यालयहरुले महँगो शुल्क लिएको गुनासोपछि महानगरले ऐनअनुसार पहिलो पटक ‘प्लस टु’को शुल्क नियमन गर्न लागेको बताइएको छ ।
महानगरका अनुसार विद्यालय व्यवस्थापन समितिले निर्णय गरेर महानगरमा पेश हुने शुल्क नै अन्तिम शुल्क हुनेछ । विद्यालयहरुले सो भन्दा बढी शुल्क लिए कारवाही गरिने महानगरले जनाएको छ ।
