काठमाडौं । प्रतिनिधिसभा विघटनविरूद्धको मुद्दा दुइ जना न्यायाधीशले हेर्न नमिल्ने भन्दै निष्ठाको प्रश्न बारम्बार उठेपछि संवैधानिक इजलासका न्यायाधीशहरू सर्वोच्च अदालत परिसरमै छलफलमा जुटेका छन् । न्यायाधीश बमकुमार श्रेष्ठ र तेजबहादुर केसीमाथि शुक्रबार र आइतबार पटक-पटक नैतिकताको प्रश्न उठाएका थिए ।
न्यायाधीश श्रेष्ठ र केसी इजलासमै रहे भने न्याय सम्पादनमा क्षति पुग्ने भन्दै रिट निवेदक पक्षका अधिवक्ताहरूले आपत्ति जनाएपछि सर्वोच्चसामु नैतिक प्रश्न सम्बोधन गर्नुपर्ने चुनौती छ । सोमबार अपराह्न चार बजेसम्म न्यायाधीशहरूको निर्णय आइसक्ने सर्वोच्च जनाएको छ ।
पूर्वमहान्यायाधिवक्ता रमन श्रेष्ठले यति गम्भीर प्रश्न उठेपछि उहाँहरूले इजलासमा नैतिकताका हिसाबले पनि बस्न नमिल्ने बताएका हुन् । उनले थपे, 'उहाँहरू (श्रेष्ठ र केसी) इजलासमा बसेपछि बहस गर्ने कि नगर्ने निर्णय गरेका छैनौँ । यति गम्भीर प्रश्न उठेपछि उहाँहरूले इजलासमा नैतिकताका हिसाबले पनि बस्न मिल्दैन । छाड्नुहुन्छ भन्ने विश्वास छ ।'
