काठमाडौँ । जनता समाजवादी पार्टीका नेता लक्ष्मणलाल कर्णले आफुहरु सरकारमा जाने बताएका छन् । सोमबार प्रधानमन्त्री केपी ओलीलाई भेट्न पुगेका कर्णले आफुहरु ८ मन्त्री र २ राज्यमन्त्रीसहित सरकारमा जाने बताएका हुन् ।
पार्टीका अध्यक्ष महन्थ ठाकुर, नेता राजेन्द्र महतो, लक्ष्मणलाल कर्णलगायतका नेताहरुले प्रधानमन्त्री ओलीसंग भेटवार्ता गरेका थिए । बैठक १० बजेदेखि २ बजेसम्म चलेको थियो ।
भेटमा मुद्दा फिर्ता र सरकारमा सहभागीताका विषयमा छलफल भएको नेता कर्णले जानकारी दिए । 'प्रधानमन्त्रीले सरकारमा आउनुस्, सँगै काम गरौं भन्नुभयो । हामीले पार्टीमा आपसमा कुरा गरेर भन्छौं भनेका छौं,' नेता कर्णले भने ।
'सरकारमा त जाने नै हो, ८ मन्त्री र २ राज्यमन्त्री लिने भनेर अध्यक्ष महन्थजीले भनिसक्नुभएको छ,' उनले भने, 'हाम्रो पार्टीमा पनि विवाद छ, त्यसलाई लिएर छलफल पछि भोलिपर्सीमा भन्छौं भनेका छौं ।'
मधेस आन्दोलन र थरुहट आन्दोलनमा सहभागी नेता कार्यकर्तामाथि लागेका केही मुद्दा फिर्ता लिने प्रविधिक काम पूरा भएपछि सरकारमा सहभागीताबारे निर्णय लिइने उनले बताए । बैठकमा दुवै तर्फबाट कार्यदलका सदस्यको पनि सहभागीता थियो । कार्यदलमा सुवास नेम्वाङ, राजन भट्टराई सर्वेन्द्रनाथ शुक्ललगायत रहेका छन् ।
