काठमाडौं । हिमालय एअरलाइन्सले तिव्वत सरकारद्वारा नेपाललाई अनुदान सहयोग दुई लाख डोज भेरो सेल खोप निःशुल्क ढुवानी गरेको छ । हिमालय एअरलाइन्सको 319-115 9N-AGK एयरबसले यहि जेठ १८ र १९ गते गरी तिव्वतको कुनमिङ्ग शहरमा चार पटक उडान गरी ती खोपहरु ढुवानी गर्ने भएको हो ।
हिमालयका ती उडानहरुले भेरो सेल खोपका २ लाख डोजका जम्मा ४१७ वटा बाकसहरु निःशुल्क ढुवानी गर्ने भएको छ । प्रत्येक पटकको उडानमा हिमालयको एयरबस जहाजले अधिकतम् १०५ वटा खोपका बाकसहरु बोक्ने जनाइएको छ । निःशुल्क उडानहरु मध्येका पहिलो कार्गो उडान काठमाडौंबाट हिजो साँझ २०ः२८ बजे कुनमिङ्गतर्फ उडी आज विहान ०६ः२८ बजे त्रिभुवन अन्तराष्ट्रिय विमानस्थलमा अवतरण गरेको थियो ।
ती निःशुल्क कार्गो उडान सञ्चालन गर्दा हिमालयले अमेरिकी डलर १९२,०००।– अर्थात् नेपाली रुपैंयाँ करिब रु दुई करोड २५ लाख बराबरको आर्थिक योगदान पुर्याउनेछ । “कोभिड–१९ महामारी विरुद्ध लड्न नेपाल सरकार र राष्ट्रलाई सहयोग पुर्याउन हिमालय एअरलाइन्स तथा सम्वद्घ समूहका लागि यो एक ऐतिहासिक क्षण हो । राष्ट्र्यि संकटको महत्वपूर्ण समयमा यी निःशुल्क कार्गो उडानहरु सञ्चालन गर्नु हाम्रा लागि वास्तवमै गौरवको विषय पनि हो ।” निशुल्क कार्गो उडानबारेबारे आफ्नो प्रतिक्रिया दिदै हिमालय एअरलाइन्सको अध्यक्ष झो एन्योङ्गले भन्नुभयो ।
हिमालयले आफ्ना यात्रुवाहक तथा कार्गोवाहक उडानहरु अत्यन्तै उच्चतहको उडान सुरक्षा मापदण्ड पालन गरि सञ्चालन गरेको जनाएको छ । कोभिड–१९ खोपको सुरक्षित पारवहनका लागि हिमालय एअरलाइन्सको व्यवस्थापनले सुरक्षित हवाई कार्गो परिवहनका पालना गरिनुपर्ने सबै आवश्यक मापदण्डहरु पूरा गरेको पनि पुष्टि गरेको छ ।
परिवहन गरिने खोपको सुरक्षाका लागि एअरलाइन्स्ले अत्यन्तै सुव्यवस्थित लोडिङ्ग र ओसार–प्रसारका विधिहरु समेत अवलम्वन गरेको छ । “कोभिड–१९ संक्रमणको दोस्रो महामारीका समयमा हिमालयले राष्ट्र सेवामा पुर्याएको यो सानो, तर महत्वपूर्ण योगदान हो । विपद्का वखतमा हिमालय जहिले पनि नेपाली जनता र सरकारका साथ रहन्छ,” खोपको पहिलो खेप काठमाडौ आइपुग्दा कम्पनीका उपाध्यक्ष विजय श्रेष्ठले भन्नुभयो ।
