काठमाडौं । विश्वमा महामारीका रुपमा फैलिएको कोरोना भाइरसका एकभन्दा बढी प्रकार निस्कन थालेपछि विश्व स्वास्थ्य सङ्गठन (डब्ल्यूएचओ)ले भाइरसको नामाकरण गर्ने नयाँ प्रणालीको घोषणा गरेको छ ।
जसका लागि डब्ल्यूएचओले कोरोना भाइरसका भेरियन्टहरुलाई जनाउन ग्रीक अक्षरहरुको प्रयोग गर्ने भएको हो ।
डब्ल्यूएचओका अनुसार बेलायतमा पहिलोपटक भेटिएको कोरोना भाइरसको भेरियन्टलाई अल्फा, दक्षिण अफ्रिकामा भेटिएको भेरियन्टलाई बिटा र भारतमा भेटिएको भेरियन्टलाई डेल्टा नामाकरण गरिएको छ ।
कोरोना भाइरसको भेरियन्ट पहिलोपटक पत्ता लागेको वा त्यसबारे जानकारी गराएकै आधारमा कुनै पनि देशलाई धब्बा लगाउन नहुने डब्ल्यूएचओको कोभिड–१९ प्राविधिक समितिकी मारिया भान कर्खोभको भनाई छ । उनले भेरियन्टमाथिको अनुगमन बढाउनु पर्ने र सङ्क्रमण रोक्नका लागि वैज्ञानिक तथ्यहरु साझा गरिनु पर्ने पनि जोड दिएकी छन् ।
भेरियन्टका नामहरुको पूर्णसूची डब्ल्यूएचओले आफ्नो वेबसाइटमार्फत सार्वजनिक गरेको छ । यदि २४ भन्दा धेरै भेरियन्ट भेटिएको खण्डमा ग्रीक वर्णमालाका अक्षर सकिनेछ र नयाँ प्रणाली घोषणा गरिने पनि डब्ल्यूएचओले जनाएको छ ।
