धरान । धरानको बिपी कोइराला स्वास्थ्य विज्ञान प्रतिष्ठान कोभिड-१९ अस्पतालमा बेडबाट लडेर घाइते भएकी कोरोना संक्रमित महिलाको मृत्यु भएको छ। मृत्यु हुनेमा सिरहाको गोलबजार-७ की ५५ वर्षीया महिला रहेकी छन् ।
उनी सोमबार बेडबाट लडेर घाइते भएकी थिइन् । सुगर बढेपछि अस्पताल भर्ना गरिएकी उनमा जेठ १३ गते कोरोना पुष्टि भएपछि कोभिड अस्पतालमा सारिएको थियो।
मृतकका ज्वाइँले घटनाको छानबिन हुनुपर्ने माग गरेका छन् । सामान्य अवस्थामा भर्ना भएकी बिरामी बेडबाट लडेर घाइते हुने अवस्था आउनुले लापरबाही भएको उनको भनाई छ ।
घटनाको सत्यतथ्य छानबिन हुनुपर्ने, सिसिटिभी फुटेज हेर्न पाउनुपर्ने र कसरी बिरामी बेडबाट लडे र उपचार कसरी भयो भन्ने स्पष्ट पारिनु पर्ने उनको माग छ ।
आफन्तले आफ्ना माग पूरा भएपछिमात्र शव बुझ्ने बताएका छन् ।
