काठमाडौं । आइसीसी एकदिवसीय विश्वकप क्रिकेट छनोट प्रतियोगिताअन्तर्गत नेपालले आज आफ्नो तेस्रो खेल वेस्ट इन्डिजसित खेल्दैछ । उक्त खेल जिम्बावेको राजधानी हरारेस्थित खेल मैदानमा मध्याह्न पौने एक बजे सुरु हुनेछ ।
दुई पटकको विश्वकप विजेता वेस्ट इन्डिजसँग नेपालले हालसम्म एउटा पनि खेल खेलेको छैन । नेपालको लागि रोहित पौडेलले कप्तानी गर्नेछन् भने वेस्ट इन्डिजको लागि शाई होपले कप्तानी गर्नेछन् । नेपाल यसअघि पहिलो खेलमा घरेलु टोली जिम्बावेसित पराजित भएको थियो । दोस्रो खेलमा नेपालले अमेरिकालाई पराजित गरेको थियो ।
नेपालले पछिल्लो पटक अमेरिकालाई हराएको टोलीलाई आज मैदानमा उतार्ने सम्भावना रहेको छ । नेपालको दीपेन्द्रसिंह ऐरी परिवर्तन गर्न सक्थ्यो । तर अमेरिकाविरुद्ध दीपेन्द्रले दुई विकेट लिनुको साथै अविजित रहि ३९ रन बनाएका थिए । त्यसैले उनलाई परिवर्तन गर्ने सम्भावना छैन ।
नियमित प्रमुख बलर सोमपाल कामी घाइते हुँदा नेपालले पछिल्लो खेलमा गुलशनलाई मौका दिएको थियो । अमेरिकाविरुद्ध गुलशनले ३ विकेट लिएका थिए। यस्तै, स्पिनर ललित नारायण राजवंशीले पनि अमेरिकाविरुद्ध १० ओभरमा २० रन खर्चेर १ विकेट लिएका थिए । सन्दीप लामिछाने पछिल्ला दुबै खेलमा विकेट विहीन रहेका छन् । उनले जिम्बावेसँग ७७ रन र अमेरिकासँग ५८ रन दिएका थिए। सन्दीप नेपालका प्रमुख हतियार भएकाले उनी खेल बाहिर रहदैनन् ।
नेपालको ब्याटिङ अलि कमजोर रहेको छ ।, तर पछिल्लो समय सुधारको क्रममा रहेको छ । ओपनिङमा आसिफ र कुशल भुर्तेल हुनेछन् । यी दुई ओपनरबाट नेपाल राम्रो सुरुवात चाहन्छ । जिम्बावेविरुद्ध यी दुई ओपनरले १ सय ७१ रनको साझेदारी गरेका थिए । तेस्रो नम्बरमा भीम सार्की आउने छन् । भीम नेपालको लागि भरपर्दो ब्याटर हुन् ।
कप्तान रोहित पौडेल चौथो र कुशल मल्ल पाँचौं नम्बरमा खेल्नेछन् । यस्तै, आरिफ शेख छैटौं, दीपेन्द्रसिंह ऐरी सातौं र गुलशन झा आठौं नम्बरमा खेल्नेछन् ।
तीव्र गतिका बलरमा करण र गुलशन रहेका छन् भने स्पिनरमा सन्दीप र ललित हुनेछन् । पार्ट टाइममा आरिफ, दीपेन्द्रले साथ दिनेछन् ।
नेपालको सम्भावित प्लेइङ–११
आसिफ शेख (विकेटकिपर), कुशल भुर्तेल, भीम सार्की, रोहित पौडेल (कप्तान), कुशल मल्ल, आरिफ शेख, दीपन्द्रसिंह ऐरी, गुलशन झा, करण केसी, सन्दीप लामिछाने र ललित नारायण राजवंशी ।
