काठमाडौं । लामो समयसम्म विवादबाट घेरिँदै आएको जनता समाजवादी पार्टी नेपाल (जसपा) आजबाट औपचारिक रूपमै विभाजित भएको छ ।
महन्थ ठाकुर पक्षले पनि अर्का अध्यक्ष उपेन्द्र यादवलाई पार्टीबाट निष्कासन गरेको हो ।
यसअघि जसपाका अध्यक्ष महन्थ ठाकुरसहित चार नेतालाई निष्कासन गरिएको पत्र अर्का अध्यक्ष उपेन्द्र यादवले निर्वाचन आयोगमा पठाइसकेको छ ।
उक्त पत्र पठाएलगत्तै ठाकुरले यादवको नाम हटाउन आयोगलाई काउण्टर पत्र पठाएका हुन् ।
ठाकुरले निर्वाचन आयोगलाई पठाएको पत्रमा यादवलाई पार्टीको विधानको दफा ५० को १ बमोजिम अनुशासन कारवाही भई साधारण सदस्य समेत नरहने गरी निष्कासन गरिएको उल्लेख छ ।
पत्रमा राजनीतिक दल सम्बन्धी ऐन २०७३ को दफा ५१ को १, २ र ३ बमोजिम दलको दर्ता किताबबाट यादवको नाम हटाइ अद्यावधिक गर्न अनुरोध समेत गरिएको छ ।
