काठमाडौँ । विशेष अदालतले आन्तरिक राजश्व विभागका महानिर्देशक चुडामणि शर्मासहित कर फर्छ्यौट आयोगका पूर्वअध्यक्ष लुम्बध्वज महत र सदस्य उमेश ढकाललाई भ्रष्टाचार मुद्दामा ९ वर्ष कैद सजाय सुनाएको छ ।
मंगलबार विशेष अदालतका अध्यक्ष न्यायाधीश श्रीकान्त पौडेल, सदस्य न्यायाधीशहरू यमुना भट्टराई र शालिग्राम कोइरालाको इजलासले उनीहरूविरुद्ध सजाय तोकेको हो ।
लुम्बध्वज महतलाई ९ वर्ष एक महिना कैद तथा ढकाल र शर्मालाई ९–९ वर्ष कैद सुनाइएको छ । यस्तै इजलासले उनीहरूलाई चार अर्ब १० करोड ४६ लाख ९७ हजार ८९८ रुपैयाँको जरिवाना समेत सुनाएको छ । उनीहरूलाई उक्त इजलासले गत जेठ १८ गते दोषी ठहर गरिसकेको छ।
राजस्व चुहावट गरी भ्रष्टाचार गरेको भन्दै अख्तियारले दायर गरेका दुई मुद्दामा उनीहरूलाई कसुर सजाय गरेको हो । गैरकानुनी सम्पत्ति आर्जन गरेको अर्को मुद्दामा भने उनीहरूले सफाइ पाएका थिए ।
अख्तियारले २०७४ साल असारमा उनीहरूविरूद्ध १० अर्ब ९६ करोड रुपैयाँ भ्रष्टाचार गरेको आरोपसहित विशेष अदालतमा मुद्दा दायर गरेको थियो । उनीहरूले विभिन्न व्यापारीलाई अनियमित तरिकाले कर छुट दिएको अख्तियारले आरोप लगाएको थियो ।
