दोलखा । माथिल्लो तामाकोसी आयोजनाको विद्युत् उत्पादनको पहिलो युनिटको परीक्षण सफल भएको छ । बहुप्रतिक्षित स्वदेशी लगानीको ४ सय ५६ मेगावाटको माथिल्लो तामाकोसीको पहिलो युनिटको परीक्षण सफल भएको हो ।
म्यानहोल चुहावटलाई पछि मर्मत गर्नेगरी आयोजनाले विद्युत् गृहको टर्बाइनमा पानी पठाएर पहिलो युनिटको सफल परीक्षण गरेको हो । यसलाई विद्युत् उत्पादन अघिको मेकानिकल परीक्षण भनिने आयोजनाका प्रवक्ता गणेश न्यौपानले बताए ।
उनका अनुसार पहिलो युनिटको टर्बाइनबाट ७६ मेगावाट विद्युत् उत्पादन हुनेछ । यसअघि पेनस्टकको परीक्षणका क्रममा बिर्कोमा चुहावट आएको थियो । ‘सुरुङमा पानी बन्द गरेर पेनस्टकको बिर्कोको मर्मत पछि गर्छौ,’ न्यौपानेले भने, ‘विद्युत् उत्पादन गर्ने सबै युनिटको परीक्षण गर्नेगरी काम भैरहेको छ ।’
बुधबारदेखि दोस्रो टर्बाइनको परीक्षण थालिने उनले जानकारी दिए । आयोजनामा देखिएका समस्या एकै पटक पहिचान गर्न टर्बाइन घुमाएर विद्युत् उत्पादन गर्ने युनिटहरुको परीक्षण थालिएको उनले बताए ।
सबै युनिटको परीक्षणपछि म्यानहोलको बिर्को मर्मत गरेर विद्युत् उत्पादन थालिने प्रवक्ता न्यौपानेले बताए । असार अन्तिमसम्ममा कम्तीमा ३ वटा युनिटबाट २ सय २८ मेगावाट विद्युत् राष्ट्रिय प्रसारण लाइनमा जोडिने तालिका राखेर आयोजनाले धमाधम परीक्षण गरिरहेको उनको भनाइ छ ।
आयोजनाबाट वार्षिक २ अर्ब २८ करोड युनिट बिजुली उत्पादन हुनेछ । आयोजनाले विद्युत् बिक्रीबाट वार्षिक करिब ९ अर्ब रुपैयाँ आम्दानी गर्नेछ ।
