काठमाडौँ । नेकपा (एमाले) बाहेकको कम्युनिष्ट र समाजवादी मिलेर बन्न लागेको समाजवादी मोर्चा मंगलबार घोषणा हुनसक्ने बताइएको छ ।
नेकपा (माओवादी केन्द्र) का प्रवक्ता कृष्णबहादुर महराका अनुसार समाजवादी मोर्चा मङ्गलवार घोषणा गर्ने तयारी गरिएको छ । उहाँले समाजवादी मोर्चाको नाम, घोषणापत्र र समसामयिक विषयमा कार्यपत्र तयार भइसकेको जानकारी दिनुभयो ।
मोर्चाको नेतृत्व, साङ्गठनिक संरचना लगायत विषयमा आज र भोलिसम्म टुङ्गो लगाइने उहाँले बताउनुभयो । अहिले तत्काल माओवादी केन्द्रसहित जनता समाजवादी पार्टी, एकीकृत समाजवादी, विप्लव नेतृत्वको नेकपा समेटिने बताइएको छ ।
डा बाबुराम भट्टराई र वामदेव गौतम नेतृत्वको पार्टीलाई समेट्ने विषयमा छलफल जारी छ ।
यसैबीच अहिले प्रधानमन्त्री निवास बालुवाटारमा प्रस्तावित समाजवादी केन्द्रका नेताहरूको छलफल चलिरहेको छ ।
बैठकमा नेकपा माओवादी केन्द्र, नेकपा एकीकृत समाजवादी, जनता समाजवादी पार्टी, विप्लव नेतृत्वको नेकपाका शीर्ष नेताहरूको सहभागिता रहेको बताइएको छ ।
