काठमाडौं । मेलम्ची खानेपानी आयोजनाको सुरूङ परीक्षणका लागि पानी बन्द गर्नुपर्ने भएकाले काठमाडौं उपत्यकामा झन्डै एक महिना पानी नआउने भएको छ।
आयोजनाका डिभिजन इञ्जिनियर राजेन्द्र पन्तका अनुसार मेलम्चीको पानी परीक्षणकै क्रममा रहेकाले तीन महिनाको परीक्षण अवधि समाप्त भएकाले असार १ गतेदेखि सुरूङ खाली गर्न सुरू गर्नुपर्ने भएकाले काठमाडौंमा पानी बन्द हुने भएको छ ।
ईञ्जिनियरहरूको टोलीले सुरूङमा केही त्रुटि छन् छैनन् भनी हेर्नेछन्। पानी खाली गराउन पन्ध्र दिन लाग्नेछ र निरीक्षण गर्न १० दिन लाग्ने छ। ‘यो अवधिमा पानी पठाउने अवस्था रहन्न,’ पन्तले भने।
उनका अनुसार ठेक्का सम्झौता समापन पनि गर्नुपर्ने बेला भएको छ। त्यसकारण एक पटक सुरूङ परीक्षण जरुरी भएको छ।
ठेक्का सम्झौता अनुसार सुरूङमा समस्या रहेको देखिए निर्माण कम्पनीले नै मर्मत गर्नुपर्ने प्रावधान छ।
अहिले मेलम्ची खानेपानी आयोजनाबाट १७ करोड लिटर काठमाडौं उपत्यकामा आइरहेको छ। त्यो पानी नआउँदा अभाव रहने भएको छ।
