एजेन्सी । भारतीय हास्य कलाकार तीर्थानन्द रावले लाइभ क्यामेराको अगाडि आत्महत्या गर्ने प्रयास गरेका छन् । तीर्थानन्द राव ‘द कपिल शर्मा शो’मा नाना पाटेकरको भूमिका निभाउनका लागि चर्चित छन् ।
फेसबुकमा लाइभ आएर उनले फिनाईल भरिएको गिलास पिए । यसअघि करिब १० मिनेटसम्म उनले आत्महत्याजस्तो कदम चाल्न बाध्य भएको भन्दै अन्त्यमा के भयो बताए ।
तीर्थानन्द रावले आफू एक महिलासँग लिभ इनमा बस्ने गरेको बताए । उनका अनुसार ती महिलाका कारण उनको तीनदेखि चार लाख रुपैयाँ ऋण पनि छ । ती महिलाले उनलाई कुटपिट गर्ने र मानसिक शोषण गर्ने गरेको उनले बताए ।
यति भनेपछि तीर्थानन्द रावले फिनाईलको डिब्बा खोलेर आफ्नो अगाडि राखिएको गिलासमा खन्याएर पुरै पिए । रिपोर्टका अनुसार उनका केही साथीहरूले तुरुन्तै पुलिसलाई बोलाए र उनलाई अस्पताल लगे ।
तीर्थानन्द रावले लाइभमा भने – ‘म एउटी महिला परवीन बानोसँग लिभ–इनमा बस्छु । उनका श्रीमानको सन् २०१३ मा मृत्यु भएको थियो । उनका दुई छोरी पनि छन् । ती महिलाले मलाई मानसिक रूपमा सताइरहेकी छन् । मैले उनलाई ९० हजारको फोन दिएँ । उसको लागि सबै गरेँ र उसले मेरो विरुद्ध पुलिसमा उजुरी गरिन् । उनले प्रहरीको अगाडि गएर मैले आफूमाथि कुटपिट गरेको बताइन् । प्रहरीले मेरो विरुद्धमा उजुरी पनि दर्ता गरेको छ । त्यसपछि उनले यो गुनासो फिर्ता लिन्छु भनेर भन्न थालिन्, तर फिर्ता लिन त टाढा, अहिले मसँग झगडा गरिरहेकी छिन् । उनीसँगै उनकी छोरीले पनि मार्ने धम्की दिइरहेका छन् ।’
