काठमाडौं । प्रधानन्यायाधीश चोलेन्द्र शम्शेर राणाले नागरिकता सम्बन्धी अध्यादेश विरूद्धका रिट हेर्न बरिष्ठ न्यायाधीशहरूलाई संवैधानिक इजलासमा तोकेका छन्। सर्वोच्च अदालतको संवैधानिक इजलासमा आज राणासहित दीपककुमार कार्की, हरिकृष्ण कार्की, मिरा खड्का र ईश्वरप्रसाद खतिवडा छन्।
प्रतिनिधिसभा विघटन विरूद्धको रिटमा संवैधानिक इजलासको रोष्टरबाट कनिष्ठ न्यायाधीश छानेका मध्ये २ न्यायाधीशले नेकपा विवादमाथि फैसला र पुनरावलोकन नहुने आदेश दिएको भन्दै प्रश्न उठ्दा इजलास गठन विवादित भएको भन्दै प्रधानन्यायाधीशको आलोचना भएको छ।
त्यसपछि सर्वोच्च अदालत भित्रै न्यायाधीशहरू र सर्वोच्च बारले बरिष्ठताका आधारमा इजलास गठन गर्न सुझाएका थिए।
उनीहरूको सुझाव अनुसार काम गर्न प्रधानन्यायाधीशले वचन दिएकाले आजको संवैधानिक इजलासलाई चासोका साथ हेरिएको छ।
नागरिकताजस्तो संवेदनशील र राष्ट्रियतासँग जोडिएको विषयमा अध्यादेश ल्याएको भन्दै अधिवक्ता बोर्णबहादुर कार्की रामबहादुर शाही लगायतका ६ रिटमाथि आजको संवैधानिक इजलासले सुनुवाइ गर्नेछ।
