काठमाडौं । २ साताअघि रोकिएको गायन रियालिटी शो ‘द भ्वाइस अफ नेपाल ३’को प्रशारण आज बाट सुरु हुने भएको छ ।
शोमा सहभागी केही प्रतिस्पर्धी र ३ जना कोचलाई कोरोना संक्रमण भएपछि यो शोको प्रशारण स्थगित भएको थियो ।
आयोजकले सामाजिक संजालमार्फत कोरोना संक्रमण बढेकाले जोखिम लिन नसकिने भन्दै शोको प्रशारण रोकिएको बताएको थियो ।
तर, कोरोना संक्रमित कोच र प्रतिस्पर्धीहरु कोरोना संक्रमणमुक्त भएकाले शोको प्रशारण सुरु गर्न लागिएको हो । यस शोका निर्देशक लक्ष्मण पौडेलले आजबाट शोको प्रशारण आरम्भ हुन लागेको जानकारी गराएका हुन् ।
कोचहरु प्रमोद खरेल, तृष्णा गुरुङ र दीप श्रेष्ठलाई कोरोना संक्रमण पुष्टी भएको थियो । जसमध्ये, प्रमोद र तृष्णा कोरोनामुक्त भैसकेका छन् । दीप श्रेष्ठ भने अस्पतालमा उपचाररत छन् ।
हरेक शुक्रबार र शनिबार बेलुकी ८ बजेबाट हिमालय टीभी एचडीमा प्रशारण हुँदै आएको यस शोमा आज बेलुकी नकआउट चरण अन्तर्गत प्रतिस्पर्धीहरुले प्रतिस्पर्धा गर्नेछन् ।
