जुवा र मनोरञ्जनका लागि विश्वभर नै चर्चित लस भेगास पूर्ण रुपमा खुला भएको छ । झण्डै एक वर्षपछि लस भेगास खुला भएको हो । शहर खुला भएको खुशीयालीमा ठूलो संख्यामा मानिसहरु भेला भएका थिए, र उनीहरुका अनुहारमा मास्क थिएन ।
बिना मास्क निस्फिक्री घुमघाम, खानपिन, सांगीतिक कार्यक्रम र कन्सर्ट गरेर नयाँ दिनलाई स्वागत गरिएको थियो । सामाजिक वा भौतिक दूरीको पनि बेवास्ता गरिएको थियो ।
अमेरिकामा खोप अभियान तिब्र बनाइएसँगै दैनिक संक्रमण दरमा व्यापक कमी आएको छ । मानिसहरु खुला एवं बिना मास्क स्वतन्त्र रुपमा घुमफिर गर्न थालेका छन् ।
एउटा कन्सर्टमा उदघोषकले भन्दै थिएः “लस भेगासका लागि आजको दिन ऐतिहासिक रात्रि हो ।” उनी पनि बिनामास्क मञ्चमा थिए । र यस कन्सर्टमा भेला भएकाहरुले मास्क लगाएका थिएनन् ।
स्थानीय समय अनुसार मंगलबार मध्यरात जोई बोई ब्यान्डले विशाल कन्सर्ट प्रस्तुत गरेको थियो ।
कन्सर्टमा भेला भएका मानिसहरु खुशीले गदगद भएका थिए । “कोभिडको त्रास सकियो, हामी यसरी खुला हुन पाएकामा ज्यादै खुशी छौं ।”
यहाँका सम्पूर्ण व्यवसाय पूर्ण क्षमतामा सञ्चालन हुन थालेका छन् । कोभिड–१९ सँग सम्बन्धित कुनै पनि प्रतिबन्धहरु यहाँ छैनन् । सबै खुला छ । लस भेगासका क्यासिनोहरु पुरै खुलेका छन् । तर क्यासिनोमा आउँदा खोप नलगाएका व्यक्तिलाई भने मास्क लगाउन भनिएको छ ।
पर्यटन नै आयस्रोत रहेको लस भेगासमा सन् २०२० को अप्रिलमा बेरोजगारी दर झण्डै ३४ प्रतिशत पुगेको थियो । अहिले लस भेगासका होटलहरु सप्ताहान्तमा ८० प्रतिशत बुकिङ भएका छन् भने अरु दिन ५० प्रतिशत बुकिङ भइरहेको स्थानीय सरकारले जनाएको छ ।
अमेरिकाका अन्य ठूला शहर एवं व्यापारिक केन्द्रहरु व्यापक स्तरमा खुल्न थालेका छन् । (सिएनएन)
—
