जनकपुरधाम । सर्वोच्च अदालतले नागरिकता वितरण रोक्न आदेश दिएर लाखौँ नेपालीको भविष्यसँग खेलवाड गरेको भन्दै धनुषाको महेन्द्रनगरका स्थानीयबासि आन्दोलित भएका छन् ।
सर्वोच्च अदालतले नागरिकता ऐन यथास्थानमा राख्न अल्पकालीन अन्तरिम आदेश जारी गरेको विरोधमा उनीहरु आन्दोलनमा उत्रिएका हुन् । । उनीहरूले पूर्व पश्चिम राजमार्गमा टायर बालेर राजमार्ग अवरुद्ध गरेका छन् ।
प्रदर्शनकारीले नेपाली नागरिकलाई अनागरिक बनाउन मिल्दैन, नागरिकतामा राजनीति बन्द गर, राष्ट्रपतिले प्रमाणीकरण गरेको विधेयकको आधारमा नागरिकता वितरण गर जस्ता नारा लगाएका छन् ।
राष्ट्रपति रामचन्द्र पौडेलले केहि दिन अगाडी मात्र थन्किएर बसेको नागरिकता विधेयक प्रमाणीकरण गरेका थिए ।
आइतबार जिल्ला प्रशासन कार्यालयहरूले प्रमाणीकरण भएको विधेयकको आधारमा नागरिकता प्रधान सूचना जारी गरेको थियो । तर, सर्वोच्च अदालतले तत्काल राष्ट्रपतिले गरेको प्रमाणीकरणलाई कार्यान्वयन नगर्न आदेश दिएपछि नागरिकता वितरण रोकिएको छ ।
सोहि कुरालाई लिएर अहिले महेन्द्रनगरबासि आन्दोलित छन् । विद्यार्थी जनमत संघ र नागरिकता विहीनहरूले जनकपुरधामस्थित जिल्ला प्रशासन कार्यालय धनुषा अगाडि प्रदर्शन गरिरहेका छन् ।
