काठमाडौँ । नेपाली कांग्रेसका महामन्त्री गगन थापाले रेशम चौधरीको आममाफी र नागरिकता विधेयक प्रमाणीकरण जस्ता विषय पार्टी सभापति शेरबहादुर देउवाको एकल सहमतिमा भएको बताउनुभएको छ ।
काठमाडौंमा शुक्रबार आयोजित प्रेस युनियनको कार्यक्रममा उहाँले यो दुई निर्णय कांग्रेसको नभएको तर पार्टी सभापतिको बलमा सरकारले गरेका निर्णयहरु पछि मात्रै थाहा पाएको थापाले बताउनुभयो ।
महामन्त्री थापाले भन्नुभयो, “आममाफी, नागरिकताको विषय, प्रदेश सरकारमा सहभागिताका लागि प्रदेशको मन्त्रालय तोडफोड, सांसद विकास कोषलगायत यी सबै विषय कांग्रेसको पार्टी सभापतिले एक्लै गर्नुभएको निर्णय हो । यो निर्णय मैले तपाईंहरुले भन्दा पछि थाहा पाएको हुँ ।”
सभापति देउवाको कार्यशैलीलाई अब नसहने चेतावनी दिँदै उहाँले भन्नुभयो, “टुलुटुलु हेरेर बसिन्न् । कांग्रेस बदलिन्छ । संघर्ष गर्ने हो ।”
