एजेन्सी । चर्को गर्मीकाबीच गुजरातको मौसममा अचानक परिवर्तन भएको छ । आगामी २ दिन मध्य गुजरात, उत्तर गुजरात र सौराष्ट्रमा पानी पर्ने भारतीय मौसम पूर्वानुमान महाशाखाले जनाएको छ ।
आइतबारदेखि उत्तरी गुजरातमा हल्कादेखि मध्यम वर्षा हुने सम्भावना छ । अहमदाबादमा पनि हल्का वर्षाको सम्भावना छ, जसका कारण इन्डियन प्रिमियर लिग (आईपीएल) २०२३ को फाइनल खेल खतरामा परेको छ ।
अहिले सहरमा हावाहुरी चलिरहेको छ भने केही स्थानमा हल्का वर्षा पनि भइरहेको छ ।
मौसम विभागले अहमदाबाद लगायत सम्पूर्ण जिल्लामा ३० देखि ४० किलोमिटर प्रतिघण्टाको हावाको गतिमा हल्का वर्षाको सम्भावना रहेको जनाएको छ ।
यदि आज फाइनलमा वर्षा वा अन्य कुनै कारणले एक बल पनि नफ्याँकी फाइनल खेल हुन सकेन भने गुजरात टाइटन्स विजयी हुनेछ ।
आईपीएलको नियम अनुसार २०–२० ओभरको खेल वर्षाका कारण हुन नसकेमा पाँच ओभरको बनाइनेछ भने पाँच ओभरको खेल नभएमा एक ओभरको सुपर ओभर हुनेछ ।
त्यसपछि एक ओभर पनि हुन सक्ने अवस्था नआएमा अंक तालिकामा बढी अंक जोडेको टोली विजेता बन्नेछ । लिग चरणमा गुजरात २० अंकका साथ शीर्ष स्थानमा थियो भने चेन्नई १७ अंकसहित दोस्रो स्थानमा रह्यो ।
