काठमाडौँ । अर्थमन्त्री डा प्रकाशशरण महतले विश्व आर्थिक मन्दीका कारण यस वर्ष नेपालको अर्थतन्त्र समेत प्रभावित भएको बताउनुभएको छ । प्रतिनिधिसभाको आइतबारको बैठकमा आर्थिक सर्वेक्षण, २०७९/८० को प्रतिवेदन प्रस्तुत गर्दै उहाँले नेपालको आर्थिक वृद्धिदर २.१६ प्रतिशतमा खुम्चिने देखिएको बताउनुभयो ।
“सन् २०२३ को सुरुवाती दिनमा नै विश्व आर्थिक गतिविधिमा आएको सुस्तता सोको प्रत्यक्ष प्रभाव नेपालको अर्थतन्त्रमा समेत परेको छ । यसको प्रभाव थोक तथा खुद्रा व्यापार, निर्माण उत्पादनमूलक उद्योग लगायत समग्र आर्थिक क्रियाकलापमा सङ्कुचन आई चालु आर्थिक वर्षको आर्थिक वृद्धिदर २.१६ प्रतिशत मात्र हुने प्रक्षेपण गरिएको छ”, उहँँले भन्नुभयो, “वस्तु आयातमा भएको सङ्कुचन र समग्र मागमा आएको सुस्तताले स्रोतमा समेत सङ्कुचन आई वित्तीय व्यवस्थापनमा समस्या आएको छ ।”
डा महतका अनुसार विश्व बजारमा पेट्रोलियम पदार्थ तथा खाद्यान्नमा भएको मूल्य वृद्धिका कारण समग्र आयातसँगै वस्तुको मूल्यमा दबाब परेको हो । “यद्यपि, पछिल्लो समय पेट्रोलियम पदार्थको निरन्तरको घट्दो मूल्यका कारण अन्य वस्तु तथा सेवाको समेत उपभोग्य बजार मूल्य घट्ने देखिएको छ”, उहाँले भन्नुभयो ।
डा महतले विगतमा विदेशी मुद्राको सञ्चिति जोगाउन गरिएको आयातको कडाइ, रेमिट्यान्स सुधार र अन्य पक्षहरूले अर्थतन्त्रको बाह्य क्षेत्र समेत सुधारात्मक रहेको बताउनुभयो । पर्यटन क्षेत्रको सुधारले हौसला प्रदान गरेको उहाँको भनाइ थियो ।
[pdf-embedder url=”https://newspolar.com/wp-content/uploads/2023/05/७९८०-आर्थिक-सर्वेक्षण-पाठ्यवस्तु-मात्र.pdf”]
