काठमाडौँ । नक्कली भुटानी शरणार्थी प्रकरणमा संलग्न रहेको आरोपमा पक्राउ परेका इन्द्रजित राईले न्यायाधीशसमक्ष बयान दिन आनाकानी गरेका छन् । आफ्नो ‘स्वास्थ्य ठिक’ नभएको भन्दै उनले बयान दिन आनाकानी गरेका हुन् ।
राईले स्वास्थ्य ठिक भएको अवस्थामा ‘टि ब्रेक’ मा बयान दिने बताएका छन् । त्यसपछि उनले अदालतमै आफ्ना वकिलसँग छलफल गरेका छन् । शुक्रबार सागर राई र केशवप्रसाद दुलालसँग बयान लिइएको थियो ।
यो प्रकरणमा संलग्न रहेका ३० मध्ये अहिलेसम्म १७ जना पक्राउ परिसकेका छन् । नेकपा एमालेका निलम्बित सचिव एवं पूर्वउपप्रधानमन्त्री टोपबहादुर रायमाझी, नेपाली कांग्रेसका नेता तथा पूर्वगृहमन्त्री बालकृष्ण खाण, उपराष्ट्रपति कार्यालयका बहालवाला सचिव टेकनारायण पाण्डेलगायत उच्च पदस्थहरू समेत पक्राउ परेका छन् ।
काठमाडौँ जिल्ला वकिलको कार्यालयले गत बुधबार उनीहरूविरुद्ध ठगी, सरकारी लिखत किर्ते, राष्ट्रियताविरूद्धको अपराध, संगठित अपराध र एकीकृत कसुरमा मुद्दा दायर गरेको थियो ।
