धनगढी । सुदूरपश्चिम प्रदेशका मुख्यमन्त्री त्रिलोचन भट्टले आज प्रदेश संसदबाट विश्वासको मत लिँदै हुनुहुन्छ । उहाँले आज मत लिन लाग्नुभएको हो ।
नेकपा एमालेले सो सरकारलाई दिएको विश्वास फिर्ता लिएको जनाएपछि मुख्यमन्त्रीले विश्वको मत लिनु परेको हो । तर एमालेकै सुदूरपश्चिम प्रदेश सभा संसदीय दलले भने उहाँलाई मत दिने भएको छ । सो दलको आज बसेको बैठकमा एमालेका माधव नेपाल र झलनाथ खनाल पक्षका सांसदहरुले मुख्यमन्त्रीलाई मत दिने बताएका छन् ।
यसैबीच नेपाली काँग्रेसको पनि प्रदेश सभा संसदीय दलले त्रिलोचन भट्ट नेतृत्वको सरकार ढल्न नदिने बताएको छ ।
माओवादी केन्द्रका मुख्यमन्त्री भट्टले केहीबेरमा प्रदेशसभामा विश्वासको मत लिने तयारी छ । त्यसअघि आजै बिहान बसेको कांग्रेस संसदीय दलको बैठकले सदनभित्रको अवस्था हेरेर निर्णय लिने निर्णय लिने अर्थात् आवश्यक परेमा मत दिने भएको हो ।
सरकारलाई समर्थन गरेको एमाले र माओवादीको मतले मुख्यमन्त्रीले विश्वासको मत नपाउने अवस्था आएमा कांग्रेसले पनि मत दिने कांग्रेस सचेतक टेकबहादुर रैकाले बताउनुभयो । मत नचाहिए कांग्रेस तटस्थ बस्नेछ र यदि मत नपुगेर मुख्यमन्त्री पदमुक्त हुने अवस्थामा आएमा काँग्रेसले मत दिनेछ, उहाँले भन्नुभयो ।