एजेन्सी । महेन्द्र सिंह धोनीको कप्तानीमा रहेको चेन्नई सुपर किंग्स कीर्तिमानी १० औं पटक आईपीएलको फाइनलमा पुगेको छ ।
मंगलबार राति भएको क्वालिफायर–१ मा साविक च्याम्पियन गुजरात टाइटन्सलाई १५ रनले हराउँदै चेन्नई फाइनलमा पुगेको हो । चार खेलमा गुजरात विरुद्ध चेन्नईको यो पहिलो जित हो । यसअघि सिएसकेले तीनवटै खेलमा हार बेहोरेको थियो । धोनी अब आइतबार पाँचौं पटक च्याम्पियन बन्न मैदान उत्रनेछन् ।
चेन्नईको एमए चिदम्बरम स्टेडियममा गुजरातका कप्तान हार्दिक पाण्ड्याले टस जितेर पहिले बलिङ गर्ने निर्णय गरेका थिए । चेन्नईले २० ओभरमा ७ विकेट गुमाएर १७२ रन बनाएको थियो । जवाफमा गुजरातको टोली २० ओभरमा १५७ रनमा सिमित भयो ।
चार पटकको च्याम्पियन चेन्नईको टोलीले उत्कृष्ट पुनरागमन गरेको छ । उ गत सिजन प्लेअफमा समेत पुग्न सकेको थिएन । यस पटक धोनीको कप्तानीमा टोलीले फेरि प्लेअफमा स्थान बनायो र त्यसपछि उपाधि नजिक पुगेको हो । फाइनल खेल अहमदाबादको नरेन्द्र मोदी स्टेडियममा हुनेछ ।
गुजरात टाइटन्सको कुरा गर्ने हो भने, हार्दिक पाण्ड्याका कप्तानीमा रहेको गुजरात यो हारपछि पनि आउट भएको छैन । उसले फाइनल पुग्ने दोस्रो मौका पाउनेछ । उसले मे २६ मा अहमदाबादमा हुने क्वालिफायर–२ खेल्नेछ । त्यहाँ उसले मुम्बई इन्डियन्स वा लखनऊ सुपर जाइन्ट्ससँग प्रतिस्पर्धा गर्नेछन् । इलिमिनेटर खेल आज बुधबार मुम्बई र लखनउबीच हुनेछ । यस खेलको विजेता टोलीले क्वालिफायर–२ मा गुजरातसँग खेल्नेछ ।
चेन्नईका लागि ऋतुराज गायकवाडले सर्वाधिक ६० रन बनाए । डेभन कोनवेले ४० रनको योगदान दिए । दुबैले पहिलो विकेटका लागि ८७ रनको साझेदारी गरेका थिए । रविन्द्र जडेजाले १६ बलमा २२ रन बनाए । अजिंक्य रहाणे र अम्बाती रायडुले १७–१७ रन बनाए ।
चेन्नईका कप्तान महेन्द्र सिंह धोनी र शिवम दुबेले एक–एक रन बनाए । मोइन अलीले चार बलमा ९ रन बनाएर अविजित रहे । गुजरातका लागि मोहम्मद शामी र मोहित शर्माले २–२ विकेट लिए । दर्शन नलकन्दे, नूर अहमद र राशिद खानले एक–एक सफलता हात पारे ।
चेन्नईले दिएको १७३ रनको लक्ष्य पछ्याएको गुजरातको टोलीले नियमित अन्तरालमा विकेट गुमाएको थियो । यसको मार उसले बेहोर्नुपरेको थियो । गुजरातका लागि शुभमन गिलले ३८ बलमा सर्वाधिक ४२ रन बनाए । उनले यस खेलमा पछिल्लो दुई खेलको उत्कृष्ट प्रदर्शन देखाउन सकेनन् । गिलले सनराइजर्स हैदरावाद र रोयल च्यालेन्जर्स बैंग्लोरविरुद्ध शतक प्रहार गरेका थिए तर यसपटक भने उनले खेल समाप्त गर्न सकेनन् ।
अन्तिम ओभरमा राशिद खानले छिटो रन बनाए । उनले टिममा आशा जगाए पनि जित हात पार्न सकेनन् । राशिदले १६ बलमा ३० रन बनाए । दासुन शनाकाले १७, विजय शंकरले १४ र ऋद्धिमान साहाले १२ रन बनाए ।
कप्तान हार्दिक पाण्ड्या आठ, मोहम्मद शामी पाँच, डेभिड मिलर चार र राहुल तेवाटिया तीन रन बनाएर आउट भए । नूर अहमदले अविजित ७ रन बनाए । दर्शन नलकन्देले खाता खोल्न सकेनन् । चेन्नईका लागि दीपक चाहर, महिश तीक्षाना, रविन्द्र जडेजा र मथिशा पथिरानाले समान २–२ विकेट लिए । तुषार देशपाण्डेले एक सफलता हात पारे ।
