काठमाडौँ । प्रमुख प्रतिपक्ष दल नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले सामाजिक सद्भावसहितको राष्ट्रिय एकतालाई सुदृढ बनाउनुपर्नेमा जोड दिनु भएको छ ।
अध्यक्ष ओलीले धर्म, भाषा, संस्कृतिसहितका विविधतायुक्त नेपालले सामाजिक सदभावसहितको राष्ट्रिय एकताको सुदृढीकरणमा जोड दिनुपर्ने बताउनु भएको हो । उहाँले विविधता मुलुकको सामूहिक सम्पत्ति भएको उल्लेख गर्दै त्यसको सदूपयोग गर्दै अघि बढनुपर्ने आवश्यक्ता समेत औंल्याउनु भयो । नेपाल मुस्लिम इत्तेहाद संगठनले सोमबार ललितपुरमा आयाजना गरेको एक कार्यक्रममा बोल्दै अध्यक्ष ओलीले नेपालीहरुले अतिवादमा जानै नहुने पनि पटकपटक दोहो¥याउनु भयो ।
मुलुकमा पनि साम्प्रदायिक विद्धेष फैंल्याउने षडयन्त्र भईरहेको उल्लेख गर्दै उहाँले त्यसबाट जोगिएर अघि बढनुपर्ने पनि बताउनु भयो । ओलीले विश्व राजनीतिमा धर्मको नाममा जनता मारिएको दृष्टान्त पेश गर्दै नेपालले पनि त्यसबाट सिकेर अतिवादको पक्षमा लाग्न नहुने बताउनु भयो । उहाँले भन्नु भयो, ‘विविधताको देश हो । हाम्रो सामाजिक विविधता, सांस्कृतिक विविधताहरु पनि छन । यसलाई हामीले, नेपालीहरु सबैले हाम्रो सम्पदा, सामूहिक सम्पत्ति हो भनेर ठान्न सक्नु पर्दछ । यो सम्पत्तिको हामीले त्यसै अनुसार सकारात्मक सदूपयोग गर्ने दृष्टिकोण लिनु पर्दछ । यसलाई परस्परमा विद्धेष, घृणा, अनेकता र फाटोको विषय बन्न दिनु हुँदैन । मैले देखेको छु–विश्व राजनीति कहिले कुन धर्म र कुन धर्म ।
कहिले एउटै धर्म भित्र पनि यो पक्ष र त्यो पक्ष भनेर विभिन्न खाले चल्ने गरेका छन । धर्मका नाउमा ठूलाठूला लडाईँहरु भएका छन । धर्मका नाउमा देश विनाश भएका छन । धर्मका नाउमा मानिसहरु मारिएका छन । त्यसकारण हामीले अतिमा जानु हुँदैन । नकारात्मक सोचमा जानु हुँदैन । र, हाम्रो देश विविधतायुक्त देश हो हरेक हिसावले । यो सम्पदा, सामूहिक सम्पदा सामाजिक न्याय र समानतासहितको सदभावसहितको, पारस्पारिक सदभावसहितको राष्ट्रिय एकतामा जानु पर्दछ । कहिलेकहिले राजनीतिक स्वार्थहरुका लागि अरु स्वार्थ होइन । राजनीतिक स्वार्थका लागि धर्मलाई हतियार बनाउने गरिन्छ । गरिएको छ । र, जनता मराएर, देश सिध्याएर धर्मको नाममा राजनीतिक रोटी सेक्ने कामहरु भएका छन । र, हामीले के बुझ्नु पर्छ भने अरुले भडकाई दिएको भरमा, अरुले उचालिदिएको भरमा, अरुले हामीलाई भावनामा बगाईदिएको भरमा हामी उचालिनु, बग्नु हुँदैन ।
हामी सामाजिक सदभाव कायम गरौं, राष्ट्रिय एकता सुदृढ गरौं । त्यो भावनाका साथ अगाडि बढनु पर्दछ । मैले देखेको छु–समयसमयमा साम्प्रदायिक विद्धेषहरु नेपालमा पनि भडकाउन खोजिएको छ । भडकाईएको छ । मान्छे मराइएको छ । झगडा लगाइएको छ । यस्ता कुराहरु भएका छन । यसभित्र भड्काउनका लागि अनेक षडयन्त्रहरु भएका छन । त्यस्ता षड्यन्त्रहरुबाट पनि हामी जोगिनु पर्दछ ।’
अध्यक्ष ओलीले नेपालीहरुबीच आपसी झगडा गराएर मुलुकको सामाजिक सदभाव बिथोल्ने प्रयास हुन सक्ने भन्दै सचेत पनि गराउनु भयो ।
