एजेन्सी । बलिउड स्टार आयुष्मान खुरानाका पिता पी खुरानाको शुक्रबार मोहालीको एक निजी अस्पतालमा निधन भएको छ ।
मुटुमा समस्या देखिएपछि उनलाई दुई दिनअघि मोहालीको फोर्टिस अस्पतालमा भर्ना गरिएको थियो । शुक्रबार दिउँसो उनको शव मोहालीबाट हरियाणाको पञ्चकुलास्थित सेक्टर ६ स्थित उनको घरमा ल्याइएको थियो ।
उनको साँझ मणिमाजरास्थित शवदाह गृहमा अन्त्येष्टि गरिएको छ । आयुष्मान खुरानाका बुवाको मृत्युको खबर पाएलगत्तै घरबाहिर मानिसहरुको भीड जम्मा भएको थियो । उनका आफन्त पनि यहाँ पुगेका थिए । साँझ ५ बजे अन्तिम दर्शनपछि उनको पार्थिव शरीरलाई अन्तिम संस्कारका लागि चण्डीगढस्थित मणिमाजरा श्मशान स्थलमा लगिएको थियो ।
आयुष्मान खुरानाका पिता पी खुराना एक प्रसिद्ध ज्योतिषी थिए । आयुष्मान खुराना र उनका भाइ अपारशक्ति खुराना बुवाको अन्त्येष्टिमा पुगेका छन् । दुबैले बुबाको मृत शरीरलाई काँध दिए ।
