काठमाडौँ । प्रधानमन्त्री पुष्पकमल दाहाल प्रचण्डले बोलाएको सत्ता गठबन्धनको बैठक छोडेर नागरिक उन्मुक्ति पार्टी (नाउपा) की अध्यक्ष रञ्जिता श्रेष्ठ डिल्लीबजार कारागार पुग्नुभएको छ ।
सर्वोच्च अदालतले जिल्ला उच्च अदालतकै फैसला सदर गरेपछि पार्टीका संरक्षक समेत रहेका रेशम चौधरीमाथिको कारबाही यथावत् राख्ने फैसला गरेपछि सोही विषयमा छलफल गर्नका लागि चौधरीले डिल्लीबजारस्थित कारागारमा बोलाएको बैठकमा सहभागी हुन श्रेष्ठ बैठक छोडेर निस्किएको बताइएको छ ।
बालुवाटारमा जारी बैठकमा सरकारको नीति तथा कार्यक्रमसहित पछिल्ला समसामयिक विषयमा छलफल भइरहेको प्रधानमन्त्रीको सचिवालयले जनाएको छ।
सरकारको नीति तथा कार्यक्रम र बजेटबारे हिजो पनि गठबन्धनका दश दलबीच प्रधानमन्त्रीले छलफल गर्नुभएको थियो । प्रधानमनत्री प्रचण्डले नागरिकता विधेयक, टीआरसीलगायको विषयलाई टुंग्याउन पनि पहल गरिरहनुभएको छ ।
गठबन्धनको बैठक चलिरहेको बेला नाउपा अध्यक्ष श्रेष्ठ बैठक छोडेर बाहिरिनुभएको हो । उहाँ वर्तमान सरकारमा भूमि तथा सहकारी विकासमन्त्रीसमेत हुनुहुन्छ ।
