एजेन्सी । इन्डियन प्रिमियर लिग (आईपीएल) अन्तर्गत आज आइतबार हुने दोस्रो खेलमा राजस्थान रोयल्स (आरआर) र सनराइजर्स हैदरावाद (एसआरएच) बीच प्रतिस्पर्धा हुँदैछ ।
जयपुरस्थित सवाई मानसिंह स्टेडियममा दुई टोलीबीचको भिडन्त साँझ ७ः४५ बजेदेखि सुरु हुनेछ ।
यदि राजस्थानले हैदरावादविरुद्ध जित निकालेमा यो उसको हैदरावादमाथि लगातार तेस्रो जित हुनेछ । राजस्थानले यो सिजन अहिलेसम्म खेलेका १० मध्ये ५ खेलमा जित निकालेको छ भने समान ५ खेलमा हार बेहोरेको छ । हाल टोली १० अंकसहित अंक तालिकाको चौथो स्थानमा छ । राजस्थानले पछिल्लो दुई खेलमा हार बेहोरेको छ ।
हैदरावादविरुद्ध राजस्थानका ४ विदेशी खेलाडी जोस बटलर, शिमरोन हेटमायर, ट्रेन्ट बोल्ट र एडम जाम्पा हुन सक्छन् । यसबाहेक यशस्वी जैसवाल, सञ्जु सामसन र रविचन्द्रन अश्विनजस्ता भारतीय खेलाडी उत्कृष्ट लयमा छन् ।
हैदरावादले यो सिजन हालसम्म खेलेका ९ खेलमा तीन जित हात पारेको छ भने ६ खेलमा हार बेहोरेको छ । हैदरावाद तालिकामा पुछारमा छ । राजस्थानविरुद्धको टोलीका ४ विदेशी खेलाडी एडेन मार्कराम, ह्यारी ब्रुक, हेनरिक क्लासेन र मार्को यानसेन हुन सक्छन् ।
सनराइजर्स हैदरावाद र राजस्थान रोयल्स, यी दुवै टोलीले लिगमा एक–एक उपाधि जितेका छन् । राजस्थान रोयल्स लिगको पहिलो सिजनमै च्याम्पियन बनेको थियो । यस्तै, सन् २०१६ मा सनराइजर्स हैदरावाद विजेता बनेको थियो । प्रतियोगितामा दुवै टोली १७ पटक आमनेसामने भएका छन् । जसमा राजस्थानले ९ र हैदरावादले ८ खेल जितेको छ ।
सवाई मानसिंह स्टेडियमको पिचले बलरहरूलाई मद्दत गर्छ । बलरका लागि पिच यति राम्रो छ कि यहाँ कुनै पनि टोलीले ठूलो स्कोर गर्न सक्दैन । यस मैदानमा टी–२० मा, यहाँ सानो स्कोर मात्र हुने गरेको छ । पहिले बलिङ गर्ने टोलीलाई खेलमा धेरै मद्दत मिल्दछ ।
जयपुरको मौसम तातो हुनेछ । जयपुरमा आइतबारको तापक्रम २५ देखि ३८ डिग्री सेल्सियसको बीचमा रहनेछ ।
दुबै टिमका सम्भावित सुरुवाती–११
राजस्थान रोयल्सः सञ्जु सामसन (कप्तान र विकेटकीपर), जोस बटलर, यशस्वी जैसवाल, देवदत्त पडिक्कल, शिमरोन हेटमायर, रविचन्द्रन अश्विन, ध्रुव जुरेल, ट्रेन्ट बोल्ट, एडम जाम्पा, युजवेन्द्र चहल र सन्दीप शर्मा ।
सनराइजर्स हैदरावादः एडेन मार्कराम (कप्तान), ह्यारी ब्रुक, मयंक अग्रवाल, हेनरिक क्लासेन (विकेटकिपर), अभिषेक शर्मा, अब्दुल समद, मार्को यानसेन, भुवनेश्वर कुमार, मयंक मार्कंडे, कार्तिक त्यागी र टी नटराजन ।
