एजेन्सी । इन्डियन प्रिमियर लिग (आईपीएल) अन्तर्गत आज आइतबार दुई खेल हुँदैछन् । पहिलो खेल गुजरात टाइटन्स (जीटी) र लखनउ सुपरजायन्ट्स (एलएसजी) बीच हुनेछ । यो खेल दिउँसो ३ः४५ बने अहमदाबादको नरेन्द्र मोदी स्टेडियममा सुरु हुनेछ ।
त्यसैगरी, आजको दोस्रो खेल राजस्थान रोयल्स (आरआर) र सनराइजर्स हैदरावाद (एसआरएच) बीच हुनेछ । आरआर र एसआरएचबीचको खेल साँझ ७ः४५ बजे सुरु हुनेछ ।
आजको खेलमा गुजरातले लखनउ विरुद्ध जित निकालेमा उसको लखनउमाथि लगातार चौथो जित हुनेछ । लखनउका नियमित कप्तान केएल राहुल चोटका कारण आईपीएलको चालू सिजनबाट बाहिर भएका छन् । यस्तो अवस्थामा क्रुणाल पाण्ड्याले टोलीको जिम्मेवारी सम्हाल्नेछन् । आईपीएलमा दुई दाजुभाइले सँगै भिन्न टोलीको कप्तानी गरेको यो पहिलो पटक हो ।
गुजरातले यो सिजन अहिलेसम्म खेलेका १० खेलमा ७ जित र ३ हार बेहोरेको छ । हार्दिक पाण्ड्याको नेतृत्वमा गुजरातले उत्कृष्ट प्रदर्शन जारी राखेको छ । साविक विजेता समेत रहेको गुजरात १४ अंकसहित अंक तालिकाको शीर्ष स्थानमा छ । टोलीले २ खेल जित्ने वित्तिकै प्लेअफमा पुग्नेछ ।
डेभिड मिलर, राशिद खान, नूर अहमद र जोशुआ लिटल लखनउविरुद्धको टोलीका ४ विदेशी खेलाडी हुन सक्छन् । यी बाहेक हार्दिक पाण्ड्या, शुभमन गिल, मोहम्मद शामी र मोहित शर्मा जस्ता खेलाडी उत्कृष्ट लयमा छन् ।
लखनउले यो सिजन अहिलेसम्म खेलेका १० खेलमध्ये ५ जित र ४ मा पराजय बेहोरेको छ । यस्तै, एक खेल भने वर्षाका कारण अनिर्णित रह्यो । टोलीको ११ अंक छ । गुजरातविरुद्धको टोलीका ४ विदेशी खेलाडी मार्कस स्टोइनिस, निकोलस पूरन, काइल मेयर्स र नवीन उल हक हुन सक्छन् । यी बाहेक रवि बिश्नोई, कृणाल पाण्ड्या र आयुष बडोनी जस्ता भारतीय खेलाडीले टोलीका लागि राम्रो प्रदर्शन गरिरहेका छन् ।
गुजरात र लखनउ दुवै टोलीको यो दोस्रो सिजन हो । हेड टु हेडको कुरा गर्दा डिफेन्डिङ च्याम्पियन गुजरातको टोली लखनउमाथि हावी रहेको छ । यी दुई टोलीबीच अहिलेसम्म जम्मा तीन खेल भएका छन् जसमा तीनै पटक गुजरातले जित निकालेको छ ।
नरेन्द्र मोदी स्टेडियमको पिचले ब्याट्सम्यानलाई धेरै सहयोग गर्छ । यो पिचमा स्पिन बलरलाई निकै समस्या छ । साँझमा शीतले पनि महत्त्वपूर्ण भूमिका खेल्नेछ । आइतबार अहमदाबादको मौसम सफा हुनेछ । पानी पर्ने सम्भावना छैन । दिउँसोको तापक्रम २८ देखि देखि डिग्री सेल्सियसको बीचमा रहनेछ ।
दुबै टिमका सम्भावित सुरुवाती–११
गुजरात टाइटन्सः हार्दिक पाण्ड्या (कप्तान), ऋद्धिमान साहा (विकेटकिपर), अभिनव मनोहर, विजय शंकर, डेभिड मिलर, राहुल तेवाटिया, राशिद खान, नूर अहमद, मोहम्मद शमी, मोहित शर्मा र जोशुआ लिटल ।
लखनऊ सुपर जायन्ट्सः क्रुणाल पाण्ड्या (कप्तान), काइल मेयर्स, मनन वोहरा, करण शर्मा, आयुष बडोनी, मार्कस स्टोइनिस, निकोलस पूरन (विकेटकीपर), कृष्णप्पा गौतम, नवीन–उल–हक, रवि बिश्नोई र मोहसिन खान ।
