एजेन्सी । अर्जेन्टिनी फरवार्ड एवं कप्तान लियोनल मेसीले क्लबको अनुमतिविनै साउदी अरबको भ्रमण गर्नु गल्ती रहेको भन्दै माफी मागेका छन् । ३५ वर्षीय मेसीले पेरिस सेन्ट जर्मेन (पिएसजी)को अनुमतिविनै साउदी भ्रमण गरेको भन्दै सो क्लबले दुई साताको निलम्बन गरिसकेको छ ।
क्लबबाट दुई साताको निलम्बनमा परेपछि मेसीले क्लब र क्लबका सहयात्रीसँग क्लबको अनुमतिविनै साउदी भ्रमण गर्नु गल्ती रहेको भन्दै माफी मागेका हुन् ।
मेस्सीले इन्स्टाग्राममा पोस्ट गरेको भिडियो सन्देशमा भनेका छन्, ‘मैले गरेको कामका लागि म माफी चाहन्छु र क्लबले के निर्णय गर्छ त्यो हेर्न म पर्खिरहेको छु । मैले इमान्दारीपूर्वक सोचे कि हामीले खेल पछिको दिन बिदा लिनेछौं जुन अघिल्लो हप्ताहरूमा भएको थियो । मैले साउदी अरेबियाको यो यात्रा पहिले रद्ध गरिसकेको थिए । तर, यसपटक सकिन ।’
पिएसजीमा मेसीको सम्झौता यो सिजनको अन्त्यसँगै सकिँदैछ । सम्झौता र सिजनको अन्त्यसँगै मेसीले पीएसजी छाड्ने तयारी गरेका छन् ।
