एजेन्सी । एकदिवसीय विश्वकपमा भारत र पाकिस्तानबीचको खेल अहमदाबादको नरेन्द्र मोदी स्टेडियममा हुन सक्ने भएको छ । एकदिवसीय विश्वकप अक्टोबर–नोभेम्बरमा हुनेछ ।
भारतीय क्रिकेट कन्ट्रोल बोर्ड (बीसीसीआई)ले भारत र पाकिस्तानबीचको खेल अहमदाबादमा गर्ने योजना बनाएको छ । तर, यसको औपचारिक घोषणा भने भइसकेको छैन । मिडिया रिपोर्टका अनुसार बीसीसीआईले भारत र पाकिस्तानबीचको प्रतिष्ठित खेल अहमदाबादमा गर्ने निर्णय गर्दैछ ।
पाकिस्तानी टोलीले अन्तिम पटक सन् २०१६ मा टी–२० विश्वकप इडेन गार्डेनमा खेलेको थियो । पाकिस्तानको भिडन्त भारतसँग भएको थियो । जसमा भारत ६ विकेटले विजयी भएको थियो ।
विश्वकप अक्टोबर ५ बाट सुरु हुन सक्छ र यसका लागि १२ स्थानहरू सर्टलिस्ट गरिएको छ । जसमा चेन्नई र कोलकाता पनि पर्छन् । बाँकी १० स्थान अहमदाबाद, लखनऊ, मुम्बई, राजकोट, बैंगलोर, दिल्ली, इन्दोर, गुवाहाटी, हैदरावाद र धर्मशाला हुन् ।
यसैबीच, पाकिस्तान क्रिकेट बोर्ड (पिबिसी)ले भने अन्तर्राष्ट्रिय क्रिकेट काउन्सिललाई सुरक्षाका कारण देखाउँदै एकदिवसीय विश्वकपका सबै खेलहरू कोलकाताको इडेन गार्डेन र चेन्नईको चेपौक स्टेडियममा खेल्न अनुरोध गरेको छ ।
यो पनि पढ्नुहोस्ः एसिया कपलाई लिएर विवाद जारी, भारत र पाकिस्तानबीचको लडाइँमा प्रतियोगिता अन्योल
