काठमाडौं । बैंक तथा वित्तीय संस्थाका धेरै शाखा पुन: सञ्चालनमा आउने भएका छन्। निषेधाज्ञा केही खुकुलो हुँदै गएपछि सकेसम्म थोरै कर्मचारी राखेर भीड नहुनेगरी आलोपालो शाखाहरु सञ्चाल गर्न राष्ट्र बैंकले निर्देशन दिएको हो।
बैंक तथा वित्तीय संस्थाहरुले उपस्थित नभई सम्पादन गर्न असम्भव हुने कामका लागि मात्रै कार्यालयमा कर्मचारीको उपस्थिति गराउन राष्ट्र बैंकले आग्रह गरेको छ। त्यस्तै प्रधान कार्यालयको हकमा एक तिहाई कर्मचारी मात्रै राखेर सेवा प्रदान गर्न भनिएको छ । उपत्यकाबाहिर स्थानीय निकायसँगको समन्वयमा शाखा संचालन गर्न राष्ट्र बैंकले आग्रह गरेको छ।
यसअघि जेठ १९ गते राष्ट्र बैंकले काठमाडौं उपत्यकामा वाणिज्य बैंकका अधिकतम ६ वटा शाखा, विकास बैंकका ४ वटा र फाइनान्स कम्पनीका ३ वटासम्म शाखा संचालन संख्या तोकिदिएको थियो।
राष्ट्र बैंकका प्रवक्ता डा. गुणाकर भट्टले पुरानो व्यवस्था हटाइएको जानकारी दिनुभएको छ। निषेधाज्ञा खुकुलो भएसँगै बैंक तथा वित्तीय संस्थाका सीमित शाखा मात्रै खुल्दा झन् भीड हुन सक्ने भएकाले थप शाखाहरु संचालन गर्नुपर्ने अवस्था रहेको भट्टले बताउनुभयो।
