काठमाडौं । पृथ्वी राजमार्गअन्तर्गत धादिङ धार्केस्थित गणेशखोलाको पुल भासिएपछि सोमबारदेखि अवरुद्ध सडक एकतर्फी सञ्चालनमा आएको छ ।
मंगलबार बिहान १० बजेदेखि एकतर्फी सवारी खुलाइएको जिल्ला ट्राफ़िक प्रहरी कार्यालय धादिङले बताएको छ ।
१८ घण्टादेखि राजमार्ग अवरुद्ध हुँदा धार्के र धार्के आसपासमा सवारीसाधनको लामो जाम लागेको छ । पूर्वपश्चिमबाट आउने केही यात्रु स्थानीय गाडी प्रयोग गरेर वैकल्पिक बाटोबाट गन्तव्यतर्फ हिँडेका थिए भने अधिकांश यात्रु त्यही रोकिएका छन् ।
भासिएको ठाउँमा ग्यावियन जाली भर्ने काम भइरहेको छ । यसका लागि नेपाल प्रहरी, नेपाली सेना र स्थानीयले काम जारी राखेका छन् ।
