एजेन्सी । इंग्लिस प्रिमियर लिग फुटबल अन्तर्गत लेस्टर सिटी र एभर्टनले बराबरी खेलेका छन् । गएराति सम्पन्न खेलमा दुबै टिमले २–२ गोलको बराबरी खेल्दै अंक बाँडेका हुन् ।
लेस्टरको घरेलु मैदानमा सुरुवाती अग्रता भने एभर्टनले लिएको थियो । खेलको १५ औं मिनेटमा डोमिनिक काल्भर्ट लेविनले पेनाल्टीमार्फत गोल गर्दै एभर्टनलाई सुरुवाती अग्रता दिलाएका थिए ।
२२ औं मिनेटमा काग्लार सोयुन्कुले गोल गर्दै लेस्टरलाई १–१ को बराबरीमा ल्याए । ३३ औं मिनेटमा जेमी भार्डीले गोल गर्दै लेस्टरलाई २–१ को अग्रता दिलाए । तर, ५४ औं मिनेटमा एलेक्स इओवीले गोल गर्दै एभर्टनलाई २–२ को बराबरीमा ल्याए । त्यसपछि खेलमा थप गोल हुन सकेन ।
बराबरीको नतिजासँगै लेस्टर सिटी ३४ खेलबाट ३० अंकका साथ १६ औं स्थानमा रहँदा समान खेलबाट २९ अंकका साथ एभर्टन १९ औं स्थानमा छ ।
