काठमाडौँ । कीर्तिपुरस्थित टियु मैदानमा जारी एसिसी मेन्स प्रिमियर कपको फाइनल खेल वर्षाका कारण पुनः अवरुद्ध भएको छ ।
कीर्तिपुरस्थित त्रिवि मैदानमा युएईले २७.३ ओभरमा ९ विकेटको क्षतिमा १०६ रन जोड्द खेल वर्षाले रोकिएको हो। पानी परेसँगै खेल रोकिएको छ भने मैदानमा कभरहरु लगाइएको छ ।
नेपालका ललित राजवंशी ह्याट्रिक बलको अवस्थामा रहेकै बेला वर्षाका कारण पुनः अवरुद्ध बनेको हो । यसअघि पनि खेलको १६औँ ओभर सकिँदा खेल रोकिएको थियो ।
तर वर्षाका कारण दुई–दुई पटक खेल अवरुद्ध हुँदा पनि खेल हेर्न पुगेका दर्शकहरू भने धैर्यतापूर्वक मैदानमै बसेका छन् । उनीहरुले झरीको कुनै पर्वाह नगरी छाता ओढेर खेल सुरु हुने प्रतीक्षा गरिरहेका छन् ।
बिहानैदेखि टीयू मैदान दर्शकले भरिएको थियो । हल्का वर्षा हुँदा पनि खेल सुरु भएको थियो । खेल सुरु भएपछि दर्शकले कोही छाता ओढेर कोही भिज्दै खेल हेरिरहेका थिए । उनीहरुले नेपाली खेलाडीहरुलाई हौसला बढाइरहेका छन् ।
नेपाल क्रिकेट संघ (क्यान) ले सामाजिक सञ्जालमार्फत् नेपाली दर्शकको यो उत्साहपूर्ण सहभागिता तथा माया र हौसलाका लागि धन्यवाद व्यक्त गरेको छ।
आजको खेलमा युएईलाई पराजित गर्दै नेपाल च्याम्पियन बनेमा नेपालले आगामी सेप्टेम्बरमा पाकिस्तानमा आयोजना हुने एसिया कपमा स्थान बनाउनेछ ।
वर्षाका कारण आजको खेल अवरुद्ध हुने सम्भावना छ । तर, आज पुरै खेल हुने अवस्था नदेखिए भोलि फाइनलका लागि रिजर्भ डे राखिएको छ ।
पहिलो इनिङ सकिएर दोस्रो इनिङको खेल २० ओभरसम्म भए डकवर्थ लुईस पद्धति (डिएलएस)बाट खेलको नतिजा लिइनेछ । त्यो पनि सम्भव नभएमा सुपर ओभर गर्ने समय रहे सुपर ओभरबाट नतिजाको छिनोफानो लगाइनेछ । पहिलो सुपर ओभर टाई भए , दोस्रो सुपर ओभर हुनेछ । यदि त्यो पनि टाई भए, एकदिवसीय वरियतामा अगाडि रहेको टिमले एसिया कपमा स्थान बनाउनेछ ।
फाेटाे -नेपाल क्रिकेट संघ (क्यान)
