काठमाडौं। काठमाडौंको सरस्वतीनगरमा १० दिनअघि भएको निरा आचार्यको हत्या दुर्घटनावश भएको प्रहरीले प्रारम्भिक निष्कर्ष निकालेको छ। कपनस्थित सरस्वतीनगरमा भाँडा पसल गर्दै आएकी निरा सख्त घाइते अवस्थामा भेटिएकी थिइन्। उनको त्यही दिन उपचारका क्रममा मृत्यु भएको थियो।
निराको हत्या आरोपमा प्रहरीले विनोद विश्वकर्मालाई पक्राउ गरेको छ। उनलाई झापाबाट काठमाडौं ल्याइँदै छ। निराको हत्यापछि लुटिएको सुनको सिक्री बानेश्वरको एक पसल भेटिएको प्रहरीले बताएको छ ।
प्रहरीले प्रारम्भिक अनुसन्धानमा लुटपाटको उद्देश्यले ‘दुर्घटनावश’ उनको हत्या भएको देखिएको छ । लुटिएको सुन भेटिएकाले लुटपाट नै हो की भन्ने आशंका रहेको घटनाको अनुसन्धानमा खटिएका एक अधिकारीले बताए ।
हत्या आरोपमा पक्राउ परेका विनोदले सोधपुछमा हत्या स्वीकार गरेका प्रहरीले जनाएको छ । विनोदले आफू डिप्रेसनको बिरामी भएको र बाटामा हिँड्दै गर्दा पसलमा एक्लै देखेकाले लुट्न खोज्दा दुर्घटनावस उक्त घटना भएको बताएका छन्। विनोदले प्रहरीसँग भनेका छन्,‘त्यहाँ झगडा पनि भएको थियो। त्यसपछि म चक्कु प्रहार गरेर निस्किएको हुँ । ’
साथीहरूको कोठामा दुई सातादेखि बस्दै आएका विनोदले प्रहार गरेका चक्कु टीकाथलीस्थित खोलामा फ्याँकेको बयान दिएका छन्।
यसरी भएको थियो घटना
बागलुङ घर भएकी नीरा झन्डै दशकदेखि सरस्वतीनगरमा भाँडा पसल गर्दै आएकी थिईन । त्यस दिन उनी पसलमा एक्लै थिईन । भाँडा पसलको पछाडि अलि भित्र काउन्टर छ । प्रायः पसलमा ग्राहक नआएका बेला उनी त्यतै बस्थिन । यही बेला नै एकान्तको छेको पारेर उनीमाथि आक्रमण भएको थियो ।
पसलको अघिल्लो भागमा छिमेकीले देख्ने भएकाले भित्र गएका बेला पारेर नै आक्रमण भएको प्रहरीको अनुमान छ । काउन्टर पछाडि भएकाले वरपरसमेत घटनाबारे थाहा हुन सकेन । दर्दनाक हत्याको कसैले सुइँको समेत पाएनन् ।
प्रहरीका अनुसार त्यस समय एकजना चिनजानकै महिला भाँडा किनेको उधारो तिर्न भाँडा पसलमा आएकी थिईन। पसलमा नीरालाई नदेखेसि उनका श्रीमान्लाई फोन गरेर कोही छैन दोकानमा भनेर सोधिन् । श्रीमान्ले पछाडि काउन्टर छ, त्यतैतिर होलिन् भित्र गएर हेर्नु न भन्ने जवाफ दिए । भित्र काउन्टर नजिक गएर हेर्दा एउटा बोरा देखियो । अलि नजिक गएर हेर्दा रक्ताम्मे अवस्थामा नीरा ढलिरहेकी देखेपछि अत्तालिएर उनले प्रहरीलाई खबर गरिन् ।
प्रहरीका अनुसार नीराको शरीरमा धारिलो हतियार (चक्कु)ले विभिन्न ठाउँमा घोचेको, ठाउँठाउँमा छियाछिया हुने गरी काटेको, हातमा कोपिएको बताएको छ । उनले प्रतिकार गर्न खोजेकोसमेत देखिएको अनुसन्धानमा खटिएका प्रहरी बताए।
यसअघिका चक्कु प्रहार भएका घटनामा सिधै घाँटीमा हान्ने, वा अन्य संवेदनशील अङ्गमा पुग्ने गरी धारिलो हतियार प्रहार भएका पाइएका थिए । तर नीराको हत्या फरक प्रकृतिले गरिएको पाईएको छ। ठाउँठाउँमा चक्कु हानेर तड्पाएर हत्या गरिएको जस्तो देखिएको छ । रगत बढी आउने ठाउँ खोजेर चक्कु हानिएको छ ।
प्रहरीको प्राविधिक अनुसन्धानमा दिउँसो २ बजेर ४४ मिनेटमा मास्क लगाएका र पछाडि झोला भिरेका एक व्यक्ती उनको पसलमा छिरेको देखिएको थियो।
ती व्यक्ती २ बजेर ५६ मिनेटमा त्यहाँबाट निस्किएका थिए। सीसीटीभीका आधारमा संलग्न व्यक्तिको तस्बिर पाएपनि उनको भने पहिचान खुल्न सकेको थिएन। प्रहरीका अनुसार ती व्यक्ती त्यहाँबाट पैदलै गोपीकृष्ण हलनजिकै पुगेका थिए र त्यहाँबाट उनी टेम्पो चढेर चाबहिलसम्म पुगेका थिए।
चाबहिलबाट इनड्राइभ (मोटरसाइकल) बाट अफलाइन जडिबुटीसम्म गएका थिए। प्रहरीलाई इनड्राइभ चलाउने व्यक्तिलाई पक्राउ गरेर बयान लिएपनि उनले कसलाई लिएर गएका थिए भन्ने पहिचान खुल्न सकेको थिएन।
नीराले घटना हुने केही घण्टा अघि आफ्नो पसलमा लामखुट्टे धपाउने ब्याट आएको प्रचार गर्न बनाएको भिडियो राखेकी थिईन । आफ्नै व्यवसायमा तल्लीन नीरालाई केही घण्टामै आफ्नो जीवन समाप्त हुँदैछ भन्ने के थाहा । त्यस दिन ठीक ११ः२१ बजेको समयमा नीराले फेसबुकमा ‘लामखुट्टे तथा किरा धपाउने ब्याट चाहिएमा हामीलाई सम्पर्क गर्नुहोला’ शीर्षक राखेर टिकटकको भिडियो राखेकी थिईन ।
