काठमाडौं । एसिसी प्रिमियर कपमा हङकङलाई ३० रनले पराजित गरदै कुवेत सेमिफाइनलमा पुगेको छ । समूह बी बाट रहेको कुवेत समूह उपविजेता बन्दै सेमिफाइनलमा स्थान बनाएको हो ।
जितको लागि २ सय ७३ रनको लक्ष्य पछ्याएको हङकङ ५० ओभरमा २ सय ४२ रनमा अल आउट हुन पुग्यो । हङकङका कप्तान निजाकत खानले सर्वाधिक ६० रन बनाए । एक समय ५६–३ को अवस्थामा पुगेको हङकङलाई निजाकत खान र अजिज खानले ९१ रनको साझेदारी गर्दै जितको आशा कायमै राखेका थिए । अजिज खान ५५ बलमा ४९ रन बनाएर आउट भए । त्यसपछि हङकङले लगातार विकेट गुमाएपछि खेल हातबाट उम्कदै गएको थियो ।
हङकङका ब्याटर यासिन मुर्तजा ४३ बलमा ४३ रन बनाउदा अंशुमन रथ १३, जिशान अली २४ तथा हरुन अर्शद १२ रनमा आउट भए ।
बलिङ तर्फ कुवेतका स्पिनर यासिन पटेलले १० ओभरमा १ मेडनसहित ३५ रन खर्चेर २ विकेट लिए । शाहरुख क्युदुसले ८ ओभरमा २७ रन खर्चेर ३ विकेट लिदा सैद मोनिब र इद्रिसले समान एक विकेट लिए ।
त्यसअघि मुलपानी क्रिकेट मैदानमा टस हारेर पहिला ब्याटिङको निम्तो पाएको कुवेतले निर्धारित ५० ओभरमा ८ विकेट गुमाउँदै २ सय ७२ रन बनायो । कुवेतको जितमा शिराज खानले ९५ बलमा ४ चौका र १ छक्कासहित सर्वाधिक ६७ रनको योगदान दिएका थिए ।
कुवेतलाई ओपनर आद्नान इद्रिसले ४५ रनमा आउट हुदा कप्तान मोहम्मद अस्लाम ३२ रन बनाए । उस्मान पटेलले ५० रन जोडे भने सैयद मोनिब ३१ रनमा आउट भए ।
बलिङ तर्फ हङकङका स्पिनर एहसान खानले १० ओभरमा १ मेडनसहित ४९ रन खर्चेर तीन विकेट लिए । आयुश शुक्ला, हरुन अर्शद, अजिज खान, यासिम मुर्तजा र मोहम्मद गजानफरले समान एक एक विकेट लिए ।
समूह ‘बी’ को उपविजेता कुवेतले शनिबार सेमिफाइनलमा समूह ‘ए’ को विजेता नेपालसँग खेल्नेछ । दोस्रो सेमिफाइनल खेलमा समूह ‘ए’ को उपविजेता ओमान र समूह ‘बी’ को विजेता युएईबीच प्रतिस्पर्धा हुनेछ ।
फाइनल हुँदै उपाधि जित्ने टोलीले एसिया कपमा भारत र पाकिस्तानसँग खेल्न पाउनेछ ।
