टेक्सास ,अमेरिका । जाँगर हुने र जानी नजानी कम्मर हल्लाउन सक्नेहरु के महिला, के पुरुष, के युवा के पाका कसैलाई नाच त एक पटक भन्नै परेन । सुरिलो स्वरका धनी चर्चित लोक गायक मिलन लामाको स्वर गुन्जिएर कानमा के पुगेको थियो बसेकै ठाउँबाट नाच्दै दर्शक श्रोताहरु स्टेजको मझेरीमा हामफाले ।
अकस्मात चिसिएर सेलाएको अस्टिनको चिसो मौसममा नेपाली मनहरु एकाएक तात्न पुगे । नयाँ वर्ष २०८० को अवसर पारेरगत आइतबार टेक्सास राज्यको राजधानी अस्टिनसँगै रहेको राउण्ड रक शहरको पाल्म भ्यालीस्थित वर्ल्ड सेटलर्स पार्कमा आयोजित शुभकामना आदान–प्रदान कार्यक्रममा नेपाली मनहरुले खुसीले नयाँ वर्षको स्वागत गरे ।
नेपाली लोक संगीतका धरोहर गायक मिलन लामा कार्यक्रमका प्रमुख आकर्षण बने । दर्शक श्रोताहरुसँगै हौसिएर गीत गाउँदै नाच्दै गायक लामाले नेपाली मनहरुलाई एकपटक साँच्चै नेपालै पुगेको अवस्थामा पुर्याइदिए । ‘माझीदाई पोखरा फेवातालको, हंगकंग आईडीले’ लगाएतका चर्चित कालजयी गीतहरु गाएर नेपालीहरुको मन मुटुमा बसेका लामाले कार्यक्रमलाई निकै उल्लासमय बनाइदिए । कार्यक्रम ग्रेटर अस्टिन नेपाली सोसाईटी (ग्यान्स) लेआयोजना गरेको हो ।
ग्यान्स टेक्सास राज्यको राजधानी अस्टिन शहर र यस वरपर बस्ने नेपालीहरुको साझा संस्था हो जसले यहाँका नेपालीहरुका लागि राम्रो काम गरिरहेको छ । यसले नेपाली संस्कृति, भाषा, धर्म संरक्षणमा ठूलो योगदान गरिरहेको छ । साथै तीज, फागु पूर्णिमा, राम नवमी लगायतका पर्वहरुमा ग्यान्सले विशेष कार्यक्रमको आयोजना गर्ने गरेको छ । ग्यान्सको नेतृत्वमा यहाँ जमिन किनेर कार्यालय भवन र साथमा पशुपति नाथको विशाल मन्दिर निर्माण कार्य पनि भइरहेको छ । ग्यान्सले भवन किनेपछि यहाँ नेपालीहरुलाई व्रतबन्ध, जन्मदिन लगायत विभिन्न कार्यक्रम गर्न निकै सजिलो भएको छ ।
शुभकामना कार्यक्रममा गीत संगीत एवं खेलकुदसहित विभिन्न मनोरञ्जनात्मक कार्यक्रमहरु पनि गरिएको थियो । यस क्षेत्रमामा बस्ने युवाहरुको सात वटा समूहबीच भलिबल प्रतियोगिता भएको थियो। त्यस्तै कार्यक्रममा हाजिरीजवाफ प्रतियोगिता पनि आयोजना गरिएको थियो।
