काठमाडौं । एसिसी प्रिमियर कपमा विरनदीप सिंह र मोहम्मद आमिरको अर्धशतकमा मलेसियाले साउदी अरेवियालाई ८ विकेटले पराजित गरेको छ ।
पहिलो खेलमा घरेलु टोली नेपालसँग पराजित भएको मलेसियाले दोस्रो खेलमा साउदीलाई सहजै हराएको हो । साउदीले जितको लागि दिएको १ सय ५४ रनको विजयी लक्ष्य मलेसियाले २१।२ ओभरमा २ विकेट गुमाउँदै पूरा गर्यो ।
मलेसियाको जितमा मोहम्मद आमिरले ४४ बलमा १२ चौकासहित अर्धशतक प्रहार गरे । उनले ५६ रनको योगदान दिए ।अर्का ओपनर विरनदीप सिंह ५३ बलमा ८ चौकाको सहयोगमा ५१ रन बनाएर आउट भए । पहिलो विकेटका लागि आमिर र विरनदीपले ८२ रनको साझेदारी गरेका थिए ।
यस्तै, साउदी अरेवियाका जैन उल अबिदीनले दुई विकेट लिए ।
त्यसअघि मुलपानी क्रिकेट मैदानमा टस हारेर पहिला ब्याटिङको निम्तो पाएको साउदी अरेविया ४६.२ ओभरमा १ सय ५३ रन बनाएर अल आउट भयो । साउदीका विकेटकिपर हसिब गाफुरले सर्वाधिक ४० रन बनाए । यस्तै, ओपनर अब्दुल वाहिदले ३६ , अतिफ उर रहमानले १८, मोहम्मद हसन शेख २१ रन बनाए ।
मलेसियाका खिजार हायतले सर्वाधिक ३ विकेट लिए । यस्तै, मोहम्मद वाफिक, रिजवान हैदर र अनवार रहमानले समान २र२ विकेट लिदा विरानदीप सिंहले १ विकेट लिए ।
एसिसी प्रिमियर कपमा समूह ए मा घरेलु टोली नेपालसँगै ओमान, कतार, मलेसिया र साउदी रहेका छन् । समूह बी मा युएई, हङकङ, कुवेत, सिंगापुर र बहराइन छन् । प्रतियोगिताको उपाधि जित्ने टोलीले आगमी सेप्टेम्बरमा पाकिस्तानमा हुने एसिया कप खेल्न पाउनेछन् ।
