एजेन्सी । भारत विश्वको सबैभन्दा बढी जनसंख्या भएको देश बनेको छ । संयुक्त राष्ट्र सङ्घीय जनसंख्या कोष (युएनएफपीए)को प्रतिवेदनले भारतमा अहिले चीनभन्दा ३० लाख बढी जनसंख्या रहेको खुलासा गरेको छ ।
तथ्याङ्क अनुसार भारतको जनसंख्या १४२ करोड ८६ लाख छ । अर्कोतर्फ चीनको जनसंख्या १४२ करोड ५७ लाख रहेको छ ।
सन् २०२३ मा भारत सबैभन्दा बढी जनसङ्ख्या भएको देश बन्ने विश्वका विज्ञहरूले यस वर्षको सुरुमै भविष्यवाणी गरेका थिए । युएनएफपीएको नयाँ तथ्यांकले पनि यसको पुष्टि गरेको छ । संयुक्त राष्ट्रसंघको प्रतिवेदन अनुसार भारतको जनसंख्या एक वर्षमा १.५६ प्रतिशतले बढेको छ ।
प्रतिवेदनमा नयाँ तथ्यांक ‘डेमोग्राफिक इन्डिकेटर’को श्रेणीमा दिइएको छ । संयुक्त राष्ट्रसंघले सन् १९५० देखि विश्वको जनसंख्या तथ्याङ्क सार्वजनिक गर्दै आएको छ । त्यसयता भारतले जनसंख्याको आधारमा चीनलाई पछाडि पारेको यो पहिलो पटक हो ।
गत वर्ष सार्वजनिक गरिएको एक प्रतिवेदनले पछिल्लो ६ दशकमा पहिलो पटक चीनको जनसङ्ख्यामा कमी आएको खुलासा गरेको छ । चीनमा जन्मदर पनि घटेको छ र यो वर्ष माइनसमा रेकर्ड गरिएको छ ।
