काठमाडौँ । एसीसी पुरुष प्रिमियर कप क्रिकेट प्रतियोगिता आज मंगलबारदेखि नेपालमा सुरु हुँदैछ । आज उद्घाटनको दिन दुई खेल हुँदैछ । काठमाडौंको मुलपानी मैदान र टियु मैदानमा एक–एक खेल हुन लागेको हो ।
कीर्तिपुरस्थित त्रिवि मैदानमा आयोजना हुने खेलमा नेपाल र मलेसियाबीच खेल हुँदैछ । नेपालले घरेलु मैदानमा मलेसियासँग पहिलो पटक ५० ओभरको खेल खेल्न लागेको हो ।
यस्तै, मुलपानी मैदानमा हङकङ र सिंगापुरबीच खेल हुँदैछ । यो खेल मुलपानी मैदानमा आयोजना हुने पहिलो अन्तराष्ट्रिय खेल रहेको छ । दुबै खेल बिहान ९ः३० बजेदेखि सुरु हुनेछ ।
एसियन क्रिकेट काउन्सिल (एसीसी)को आयोजनामा हुने उक्त प्रतियोगिता यही वैशाख ५ गतेदेखि १८ गतेसम्म सञ्चालन हुनेछ । प्रतियोगिताका खेल कीर्तिपुरस्थित त्रिवि मैदान र मूलपानीमा रहेको क्रिकेट मैदानमा सञ्चालन हुनेछ । प्रतियोगितामा विभिन्न १० राष्ट्रको सहभागिता रहने छ । सहभागी राष्ट्रलाई दुई समूहमा विभाजन गरिएको छ ।
समूह ‘ए’ मा आयोजक नेपालसहित मलेसिया, साउदी अरेबिया, कतार र ओमान रहेका छन् । समूह ‘बी’ मा बहराइन, कुवेत, सिङ्गापुर, हङकङ र युएई रहेका छन् । फाइनल खेलको विजेता टोली एसिया कपका लागि छनोट हुनेछ । एसिया कप आगामी सेप्टेम्बरमा आयोजना हुनेछ ।
नेपाली टिमः रोहित पौडेल (कप्तान), कुशल भुर्तेल, भीम सार्की, आसिफ शेख, प्रतिष जिसी, ज्ञानेन्द्र मल्ल, ललित राजवंशी र कुशल मल्ल, आरिफ शेख, दीपेन्द्र सिंह ऐरी, गुलशन झा, सोमपाल कामी, करण केसी, सन्दीप लामिछाने
वैकल्पिक खेलाडीः किशोर महतो, अर्जुन साउद, सन्दीप जोरा, सूर्य तामाङ
