एजेन्सी । इंग्लिस प्रिमियर लिग फुटबल अन्तर्गत लिभरपुलले सानदार जित निकालेको छ । गएराति सम्पन्न खेलमा लिभरपुलले लिड्स युनाइटेडलाई उसकै मैदानमा ६–१ गोलले हराएको हो ।
लिभरपुललाई फराकिलो जित दिलाउन मोहमद सलाह र डिओगो जोटाले दुई–दुई गोल गरे भने कोडी गाक्पो र डार्विन नुनेजले एक–एक गोल गरे । लिड्सका लुइस सिनिस्टेराले एक गोल फर्काए ।
खेलको ३५ औं मिनेटमा गाक्पोको गोलबाट लिभरपुलले सुरुवाती अग्रता बनाएको थियो । ३९ औं मिनेटमा सलाहले गोल गर्दै लिभरपुलको अग्रता दोब्बर पारे । ४७ औं मिनेटमा सिनिस्टेराले गोल गर्दै लिड्सलाई १–२ को स्थितीमा ल्याउँदै खेलमा फर्काउने कोशिस गरे ।
तर, दोस्रो हाफमा लिभरपुलले गोलको वर्षा गर्यो । ५२ औं मिनेटमा डिओगोले गोल गर्दै लिभरपुललाई ३–१ ले अघि बढाए । ६४ औं मिनेटमा सलाहले व्यक्तिगत दोस्रो तथा टिमका लागि चौंथो गोल गरे ।
७३ औं मिनेटमा डिओगोले व्यक्तिगत दोस्रो तथा टोलीका लागि पाँचौं गोल गरे । यस्तै, ९० औं मिनेटमा नुनेजले गोल थप्दै लिभरपुललाई ६–१ को जित दिलाए ।
यो नतिजासँगै ३० खेलबाट ४७ अंक जोडेको लिभरपुल तालिकाको आठौं स्थानमा छ । यस्तै, लिड्स ३१ खेलबाट २९ अंकका साथ १६ औं स्थानमा छ ।
