काठमाडौँ । विशेष अदालतले नेपाल आयल निगमका पूर्वकार्यकारी निर्देशक गोपालबहादुर खड्काविरुद्ध पक्राउ पुर्जी जारी गरेको छ । खड्काविरुद्ध गैरकानुनी सम्पत्ति आर्जन (भ्रष्टाचार) मुद्दामा विशेष अदालतले सोमबार पक्राउ पुर्जी जारी गरेको हो । सोमबार न्यायाधीशहरू यमुना भट्टराई, बलभद्र बास्तोला र खुशीप्रसाद थारुको संयुक्त इजलासले खड्कासहित चार जनाविरुद्ध पक्राउ पुर्जी जारी गरेको हो ।
खड्काविरुद्ध २०७५ सालमा अख्तियार दुरुपयोग अनुसन्धान आयोगले रु १८ करोड ६६ लाख गैरकानूनी रूपमा सम्पत्ति आर्जन गरेको भन्दै विशेष अदालतमा मुद्दा दायर गरेको थियो । खड्कालाई २०७१ साल माघमा मन्त्रिपरिषद्ले निगमको कार्यकारी निर्देशकमा नियुक्त गरेको थियो ।
धेरै विवादमा मुछिएपछि सरकारले २०७४ असोजमा विभिन्न संसदीय समितिको सिफारिसबमोजिम उहाँलाई पदच्युत गरेको थियो ।
अख्तियारका अनुसार खड्काले श्रीमती शर्मिला खड्का र अन्य व्यक्तिका नाममा समेत चलअचल सम्पत्ति लुकाइराखेको बताएको थियो । सोही आरोपमा उसले विशेष अदालतमा मुद्दा दायर गरेको थियो । यद्यपि सुनुवाइका लागि पटक पटक पेशी तोकिए पनि खड्का उपस्थित नभएपछि विशेष अदालतले सोमबार उहाँविरुद्ध पक्राउ पुर्जी जारी गरेको हो ।
तत्कालीन सुशील कोइराला नेतृत्वको सरकारले निगम सुधारको प्रयास थालेका चण्डिका भट्टलाई हटाएर अवकाशप्राप्त इन्जिनियर (उपसचिव) खड्कालाई कार्यकारी निर्देशकमा नियुक्त गरेको थियो । डिभिजन सडक कार्यालय काठमाडौँमा कार्यरत रहँदा विभिन्न अनियमिततामा मुछिएका खड्का राजीनामा दिएको केही दिनमै निगमका कार्यकारी प्रमुख बन्नुभएको थियो ।
