बिराटनगर । नेपाली काँग्रेस मोरङमा क्रियाशील सदस्यता वितरणमा धाँधली भएको भन्दै कार्यकर्ताले पार्टीको ४ नम्बर क्षेत्रीय कार्यालयमा तालाबन्दी गरेका छन् । नेविसंघ नेता पास्चर घिमिरे र मिलन श्रेष्ठले क्रियाशील सदस्यता वितरणमा धाँधली भएको भन्दै क्षेत्रीय कार्यालयमा तालाबन्दी गरेका हुन ।
नेपाली काँग्रेस क्षेत्रीय कार्य समितिले वार्ड समितिले सिफरिस गरी पठाएका क्रियाशील सदस्यता पाउनै पर्ने केही व्यक्तिहरुको नाम क्षेत्रीय कार्यसमितिले तानाशाही ढंगबाट पाखा लगाएको श्रेष्ठ र घिमिरेले जारी गरेको विज्ञप्तिमा उल्लेख छ ।
उनीहरुले पार्टीभित्र मनोमानी गर्ने गिरोहलाई कारवाही गर्न माग गरेका छन् । नेतृत्वको यस्तो व्यवहारले नेपाली काँग्रेस लोकतान्त्रिक पार्टी हो कि हैन भन्ने प्रश्न खडा भएको घिमिरे र श्रेष्ठको आरोप छ ।
बिराटनगर वडा नम्बर ३ निवासी सक्रिय काँग्रेस कार्यकर्ताहरूको योगदानको मूल्यांकन गर्दै क्रियाशील सदस्यता दिइनुपर्ने उनीहरुको माग छ ।
