एजेन्सी । पछिल्ला केही इनिङ्समा खराब प्रदर्शनका बाबजुद पनि भारतीय ब्याट्सम्यान सूर्यकुमार यादव बुधबार जारी आईसीसी टी–२० ब्याटिङ वरियतामा शीर्ष स्थानमा रहे । सूर्यकुमारको ९०६ अंक छ ।
उनी पछि क्रमशः दोस्रो, तेस्रो, चौथो र पाँचौं स्थानमा पाकिस्तानका मोहम्मद रिजवान (८११ अंक), बाबर आजम (७५५ अंक), दक्षिण अफ्रिकाका एडेन मार्कराम (७४८ अंक) र न्युजिल्यान्डका डेभोन कोनवे (७४५ अंक) छन् । विराट कोहलीको स्थानमा कुनै परिवर्तन भएको छैन । उनी १५ औं स्थानमा यथावत छन् । उनको ६१२ अंक छ ।
सूर्यकुमारले इन्डियन प्रिमियर लिग (आईपीएलमा) अहिलेसम्म राम्रो प्रदर्शन गर्न सकेका छैनन् । उनी मुम्बई इन्डियन्सबाट तीन खेलमा १५, ०१, शून्य रन बनाएर आउट भएका थिए ।
बलिङतर्फ भने अफगानिस्तानका स्पिनर राशिद खान (७१०) शीर्ष स्थानमा छन् । शीर्ष १० बलिङ टी–२० वरियतामा कुनै पनि भारतीय बलर परेका छैनन् ।
