काठमाडौँ । नेपाल उद्योग वाणिज्य महासंघको वरिष्ठ उपाध्यक्षमा दोस्रो चरणमा निर्वाचन हुने भएको छ । वरिष्ठ उपाध्यक्षको प्रतिस्पर्धामा रहेका उमेशलाल श्रेष्ठ, अञ्जन श्रेष्ठ र रामचन्द्र संघईमध्ये कसैले पनि ५० प्रतिशत मत नल्याएपछि दो्स्रो चरणको मतदान हुने भएको हो ।
बुधबार भएको निर्वाचनको सबै मत परिणाम आज बिहान सार्वजनिक हुँदा कसैले पनि ५० प्रतिशत मतभार कटाउन नसकेपछि सबैभन्दा धेरै मत पाएका अञ्जन श्रेष्ठ र उमेशलाल श्रेष्ठबीच दोस्रो चरणको निर्वाचन हुन लागेको हो ।
अर्का प्रत्यासी रामचन्द्र संघई भने प्रतिस्पर्धाबाट बाहिरिनुभएको छ ।
अञ्जनले ३७.९९ प्रतिशत मत ल्याउनुभयो भने उहाँका निकटतम प्रतिस्पर्धी उमेशलालले ३१.७१ प्रतिशत मत प्राप्त गर्नुभयो । त्यसैगरी ३०.४६ प्रतिशत मत प्राप्त गर्नुभएका संघई दोस्रो चरणको प्रतिस्पर्धाबाट बाहिरिनुभएको हो ।
निर्वाचनले आगामी ३ वर्षका लागि वरिष्ठ उपाध्यक्षसहितका केन्द्रीय सदस्यको नयाँ नेतृत्व चयन गर्दैछ । हालका वरिष्ठ उपाध्यक्ष चन्द्र ढकाल स्वत: अध्यक्ष हुनुहुनेछ । वरिष्ठ उपाध्यक्ष स्वत: अध्यक्ष हुने भएकाले महासंघको निर्वाचनमा वरिष्ठ उपाध्यक्षलाई महत्त्वका साथ हेरिने गरिन्छ ।
