बुटवल । लुम्बिनी प्रदेश सभामा सरकारको वैधता र बजेट विनियोजन प्रक्रियाको विरोध जनाउँदै प्रमुख प्रतिपक्षले अवरोध गरेपछि प्रदेश सभा बैठक बुधबारसम्मका लागि स्थगित भएको छ ।
प्रदेशका आर्थिक मामिला तथा योजनामन्त्री बैजनाथ चौधरीले असार १ गते ४० अर्ब ९५ करोड ९७ लाखको बजेट प्रस्तुत गरेका थिए । बजेटमाथि आइतबारदेखि प्रदेश सभामा छलफलका लागि कार्यसूची तय भए पनि बैठकको सुरुमै नेपाली कांग्रेस संसदीय दलका नेता वीरेन्द्रप्रसाद कनौडियाले बोलेपछि विपक्षी दलले बैठक बहिष्कार गरेका थिए ।
त्यसपछि ३ बजेसम्मका लागि स्थगित भएको बैठक सूचना टासेर बुधबारसम्मका लागि स्थगित भएको हो ।
प्रतिपक्षी दलका प्रमुख सचेतक फकरुद्धिन खानले राजीतिक रुपमा सरकारको वैधताको टुंगो नलाग्दासम्म र आवश्यकताभन्दा कार्यकर्ता र वितरणमुखी बजेट परिमार्जन नहुँदासम्म सदन चल्न नदिने निर्णय भएको बताएका छन् ।
सरकारमा जनता समाजवादीका चार मन्त्री सहभागी भएपछि विपक्षी गठबन्धनले सरकार संविधानको धारा १६८ को उपधारा २ अनुसार चल्दै आएको भन्दै प्रदेश सभाबाट विश्वासको मत लिनु पर्ने अडान विपक्षी गठबन्धनले राख्दै आएका छन् ।
