काठमाडौँ । पुष्पकमल दाहाल प्रचण्ड नेतृत्वको सरकारमा नेपाली कांग्रेसबाट थप मन्त्री बन्नेहरुको लगभग टुंगो लागेको छ । सत्तारुढ दलहरुबीच भएको भागबन्डामा कांग्रेसलाई ८ वटा मन्त्रालय दिने सहमति भएको थियो । तर पार्टीभित्रै मन्त्री बन्नेहरुमा भागबन्डा नमिलेपछि कांग्रेसले ४ जना मात्र मन्त्री सरकारमा पठाएको छ ।
शेखर कोइराला–गगन थापा समूहले कम्तीमा ३ मन्त्री पाउनुपर्ने अडानबाट पछि नहटेपछि चैत १७ मा सभापति शेरबहादुर देउवाले आफ्ना समूहका चार नेतालाई मात्र मन्त्रिमण्डलमा पठाएका थिए ।
अब बाँकी रहेको चार मन्त्रीको कोटामा उपसभापति धनराज गुरुङ, नेताहरु मोहन बस्नेत, एनपी साउद, डिगबहादुर लिम्बु र सुरेन्द्र आचार्य मन्त्री बन्ने स्रोत बताउँछ ।
साउद र बस्नेत संस्थापन समूहका हुन् । बस्नेतले स्वास्थ्य तथा जनसंख्या मन्त्री दाबी गर्दै आएकाले साउद परराष्ट्र मन्त्री बन्ने सम्भावना रहेको बताइन्छ । यस्तै, डिगबहादुर लिम्बुलाई कानुनमन्त्री बन्न भनिएको छ । कांग्रेसबाट मन्त्री बन्नेहरुको लगभग टुंगो लागेसँगै आजभोलिमै मन्त्रिपरिषद् विस्तार गर्ने तयारी भएको नेताहरु बताउँछन् ।
